Метрополіта: Треба забезпечіти повноцінну роботу на Зепмліні. Автострада поможе і реліґійным односинам

Пряшівскый архієпіскоп метрополіта Йоан Бабяк прияв у своїм уряді в пятніцю 5-го фебруара 2021-го року председу Обчаньского здружіня Автострада на Земплін (OZ Diaľnica na Zemplín) і єдночасно старосту села Башківці, Собранецького окресу, Петра Баторі. Інформовав о тім Михал Павлишіновіч, говорця Пряшівской ґрекокатолицькой арцієпархії.

Метрополіта быв інформованый о основаню обчаньского здружіня, його замірах і планах підпорити штонайскоріше выбудованя автострады, котра буде спаяти Вышнє Німецьке – державна граніця з Українов, і послідню збудовану часть коло Кошыць в селі Бідовці.

Обговорили соціално-економічны вопросы

Староста Баторі подробно пописав владыкови сучасну складну економічно-соціалну сітуацію, котра є в селах близко україньской граніці.

За його словами брак інфраштруктуры нелем не приносить інвесторів до того простору, але запричінює, же одходять і тоты, котры там дотеперь были, до лоґістічно выгоднішых областей. Тота сітуація має вплив на велике чісло людей нелем коло граніць, але в цілій области Земпліна.

Метрополіта сконштатовав, же треба прияти прородинну політіку з боку державы, а єдночасно треба забезпечіти такы економічны обставины на Земпліні, жебы жывителі родин не мусили подорожыти далеко за роботов, одходжати од своїх родин, што має непрязны наслідкы на фунґованя родин.

Каждый граждан Словацькой републікы мусить маи штонайпростішый приступ ку повноцінній і єдночасно справедливо оціненій роботі, конштатовав архієпіскоп. Но то подля нього не є можливым, покля не є достаточно збудована інфраштруктура.

Поможе то і реліґійным односинам

Архієпіскоп Бабяк так само повів, же добудованя автострады по выходну граніцю з Українов поможе і реліґійным односинам в рамках штруктур Ґрекокатолицькой церькви, кедьже „Пряшівска метрополітна церьков вєдно з Мадярьсков ґрекокатолицьков церьквов суть дітми єдной матерьской Мукачівской ґрекокатолицькой церькви, котра має центер в Ужгороді.“

За його словами в рамках тісной співпраці меджі тыма церьковныма штруктурами бы штонайскоріше добудованя автострады вызначно полегшало і роботу на реліґійнім полю. В тім контексті спомянув і доста докінчены роботы на автостраді меджі Мішколцом і мадярьско-словацьков граніцьов.

Архієпіскоп на стрічі повів, же тот проєкт має його підпору, што наслідно было потверджене і переданьом цертіфікату владыкови, як підпорьовательови Обчаньского здружіня Автострада на Земплін.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА