Мікловш Шолтес: Мы Русинам в припаді потребы поможеме

„Покля Україна не вызнавать (…) лоялну русиньску комуніту, потім єй мадярьска влада в припаді потребы прийме і поможе Русинам за граніцями,“ повів на торжественній події посвячіня і одкрытя Русиньского ґрекокатолицького центру державный секретарь із вопросів реліґійных і націоналных звязків Канцеларії премєрміністра Мадярьска Мікловш Шолтес.

Новый русиньскый центер быв одкрытый в районі Йовжа в місті Дебрецин у пятніцю 26-го апріля 2019-го року. „Сьме єдина меншына в Мадярьску, котра може теперь гордити ся такым центром,“ повіла про редакцію Віра Ґіріц, представителька Русинів у мадярьскім парламенті. Центер посвятив владыка Філіп (Кочіш), архієпіскоп гайдудорозькый і метрополіта Мадярьска.

Мікловш Шолтес на події припомянув, же меджі першыма Мадярьско вызнало незалежну Україну і скрітіковав закон, котрый у четверь прияла Верьховна рада Україны як неприятельный.

Меджі першыма сьме вызнали Україну

Шолтес припомянув, же по роспаді Совітьского союзу Мадярьско меджі першыма вызнало незалежну Україну, підтримало їй намагы о меджінародну інтеґрацію, зробило гранічны переходы і дало гуманітарну поміч, кедь требало і не робило різніцю меджі Мадярями, Русинами або Українцями на Україні.

„Но теперь, жаль Богу, зажываме, же русиньска народность не є вызнана за окрему народность і вчера зродив ся закон (на Україні, позн. редакції), котрый є цалком неприятельный,“ повів далше Шолтес, котрый підкреслив, же тот закон не піде лем проти великой російской меншыны, але дотулять ся і Мадярів, Булгарів, Румунів, Русинів, Словаків і Поляків.

Шолтес так ясно скрітіковав новый Закон о функціонованю україньского языка як державного языка, котрый у четверь 25-го апріля 2019-го року прияла Верьховна рада Україны, і котрый під санкціями запроваджать майже у вшыткых областях жывота лем україньскый язык. Державный секретарь додав, же є неприятельне, жебы сусідня держава, котра має тугу по европскій інтеґрації, до такой міры діяла проти народностей.

Маєме унікатны односины з меншынами

Мікловш Шолтес на події далше повів, з одкликаньом ся на комуніту Русинів, же влада надвязала в попереніх восьмых роках унікатны односины з меншынами, котры суть допроваджаны унікатнов сістемов підпоры, яка має свої резултаты в области културы, самосправы і церьковных односин. Влада підпорила лем будованя нового русиньского центру сумов 39 міліонів форінтів, што є понад 120 тісяч евр.

Жрідло фотоґрафії: gorogkatolikus.hu.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА