Музей в Гуменнім позывать на Карпатьску писанку 2023

Вігорлатьскый музей в Гуменнім вєдно з партнерами позывають на XXXI. річник меджінародной выставы писанок Карпатьска писанка 2023. Як інформовала за музей Яна Федічова, святочна вернісаж вєдно з оціньованьом конкурзу одбуде ся 16-го марца 2023.

Покровительство на тогорічнов Карпатьсков писанков перевзяв амбасадор Словацькой републікы на Україні Марек Шафін і председа Пряшівского самосправного краю Мілан Маєрьскый.

Цільом меджінародого конкурзу і презентачной выставы Карпатьска писанка є підпора традіції писанкарьства як вызначного елементу културной дідовизны карпатьского реґіону. Намагов Вігорлатьского музея єдночасно є глядати творців писанок, і давати простор про творчу конфронтацію, штудіум традічной културы, розвиток творчой і технічной здібности дітей, молодежи і дорослых з різных реґіонів Словакії і заграніча.

Тогорічна подія з погляду утримованя сполочной традіції як вызначного елементу взаємной културной співпраці карпатьскых пригранічных країн здобывать нелем сімболічне значіня.

Честным гостьом події Карпатьска писанка 2023 є Музей писанок в україньскім місті Коломыя, котрый є своїм заміряньом научного баданя і презентації писанкарьства єдиным у світі. В сітуації, в котрый сучасна Україна находить ся, музей хоче такым способом своїм довгорічным партнерам уможнити презентовати свою унікатну културну дідовизну на Словакії.

В актуалнім річнику представлює музей писанкы із Словакії, Чеськой републікы, Україны, Польщі і Мадярьска. Выставльованы колекції доповнюють писанкы із збіркового фонду Вігорлатьского музея в Гуменнім, котры документують розвиток традіції того уменя в карпатьскій области од минувшого столітя.

Дотеперь Вігорлатьскый музей выставльовав понад 26 тісяч писанок із Словакії і заграніча. В просторах музея почас дотеперішніх річників презентовало ся майже 800 авторів з різных реґіонів Словакії, Чеськой републікы, Польщі, Україны, Мадярьска, Румунії і Споєных штатів Америкы.

2-го і 3-го апріля в рамках выставы одбуде ся в музею і Великодный ярмарок писанок, орґанізовати ся почас тырваня выставы будуть і творчі варштаты про школы.

Выстава Карпатьска писанка 2023 буде в Ґалерійній салі Ореста Дубая, і приступна буде од 16-го марца до 30-го апріля.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА