Музей Варгола планують отворити на ярь слідуючого року

Музей модерного уменя Енді Варгола в Меджілабірцях, єден із двох музеїв Варгола у світі і єдиный в Европі, є од марца 2023-го року запертый. Будова переходить великов реконштрукційов.

Як в пятніцю 23-го мая 2025-го року інформовав Пряшівскый самосправный край, котрый є зряджовательом музея, ставебна часть проєкту є успішно у своїм фінале.

„Музей є з того боку змодернізованый і перебудованый в змыслі первістных планів і візій. Уж днесь можеме похвалити ся новыма експозічно-едукатівныма просторами, амфітеатром про приблизно 100 людей, енвіроманталныма елементами в подобі зеленой веґетатівной стріхы, і унікатным перепоїньом інтерьєру з екстерєрьом посередництвом стріхы і фасады, по котрых ся дає ходити,“ інформовала пряшівска жупа.

Як далше край написав на своїм сайті на сіті Facebook, фундаменталныма змінами перешов інтерьєр, в котрім суть вытворены новы выставны експозіції, прибыли ґарадічі, єден шток, і вдяка звекшеным просторам выникли різны оддыховы зоны і бістро в спідній части будовы.

„Модернізаційов перешли вшыткы закутины будовы, як і технолоґії, включно якостной воздушной технікы і безпечностных сістем.“ Перебудовало ся за приблизно 13,2 міліонів евр.

Музей теперь чекать далша фаза, в рамках котрой буде рішыти ся інтерьєрове выбавліня музея різной сорты і мултімедіално-інтерактівны елементы. Інтерьєр принесе много атіпічных елементів, котры ся роблять на міру про музей – од меблів, технолоґічных аспектів аж по інтерактівны авторьскы творы.

„Нашов амбіційов є діло докінчіти до кінця того року, отворіня видиме на ярь 2026-го року,“ інформовав Пряшівскый самосправный край.

Фото: FB/Prešovský samosprávny kraj.