Пряшівскій Музей Русиньской Культуры одкрыват днес ІV Русиньскій Фестіваль во Свиднику

Русиньскій Фестіваль во Свиднику то не лем подіі, звязаны з музычныма концертами, котры проходят на сцені свидницкого амфітеатру. Цілий тыжден в ріжных місцях Свидника проходят і другы подіі, котры што рока прикрашают тот бодай найбільший русиньскій фестіваль на світі. Першом з них, будучом тіж одкрытьом тогорічного фестівалю, буде презентация о активностях, акциях, подіях і вшыткым, што ся діє в Словацкым Народным Музею – Музею Русиньской Культуры в Пряшові. Початок і одкрытя фестівалю одбуде ся 23. мая 2016 р. о 15.30 год. в Піддукляньскій Бібліотеці во Свиднику.

Музей Русиньской Культуры в Пряшові, котрий єст одділіньом Словацкого Народного Музею, як головны задачы має статутово записаны: досліджаня, громаджыня, забезпечаня, консервацию і удоступняня для публикы проявів материяльной, соспільной і по части духовой культуры Русинів. Днес активніст пряшівскых музейників зосереджат ся на документуваню русиньского ремесла, штукы і культурных памяток на Словациі, хоц декляруют они заінтересуваня пошырюваньом музейного збіркового фонду о артефакты і памяткы з інчых держав, котры заселяют Русины. Музей Русиньской Культуры в Пряшові то єдна з професийональных інституций, плекаючых русиньску культуру на Словациі.