На граді в Старій Любовні выставили кральовску едіцію Варгола

На граді Любовня  выставили цінне діло Енді Варгола, в рамках експозіції ловецького салоника Палаца Любомірьскых буде мож видіти го до кінця септемнра того року. Інформовала о тім аґентура TASR.

Директор Любовняньского музея Далібор Микулик повів, же іде о комплетне портфоліо Кральовной Нытомбі. Його цінность потверджує головно факт, же іде о такзавну royal edition, значіть кральовску едіцію посыпану діамантовым порохом.

„Значіть то, же його частями суть штири образы той самой кральовной, но все в іншій фаребній варіації, причім за комплетне портфоліо бере ся комбінація вшыткых штирьох образів, котры творять єден цілок. Тото портофіліо Кральовной Нытомбі є зроблене техніков screenprint – сітьодрук, котру Енді Варгол хосновав майже при вшыткых своїх творах,“ повів Микулик.

Світово познатый твор Енді Варгола подарило ся в Старій Любовні выставити вдяка співпраці з Музейом модерного уменя Енді Варгола в Меджілабірцях, одкыль го перевезли.

„На світі є лем пять фалатків той кральовной. Образ сьме дали якраз до Палаца Любомірьскых, котрый як послідній перешов реконштрукційов, значіть, є в нім рекуперація і має так само безпечностных атрібуты. Єдночасно на облаках суть фолії, жебы го не пошкодило денне світло,“ додав директор.

Як повів, то найдорогшый образ, якый мали історічно на граді. Енді Варгол єднакым штілом зробив і кральовны Голандії, Данії а Великобрітанії.

„Нашым цільом было такым сімболічным способом скапчати кральовны Енді Варгола з кральовнами, котры колись навщівили наш град, ці то была угорьска кральовна Марія І. або як послідня іспаньска кральовна Ісабел де Борбон. Думам, же ся нам то подарило,“ сконштатовав директор.

Фотоґрафія: Лубовняньскый музей.