„На каву“ з Варголовым музейом

Тырваючі рештрікції в повязаню з пандемійов нового тіпу корнавірусу привели Музей модерного уменя Енді Варгола в Меджілабірцях ку перенесеню своїх актівностей до оналйн простору.

Як інформовала аґентура TASR, в четверь 18-го марца спустив музей на соціалній сіті Facebook проєкт під назвов Coffee break. Посердництвом нього буде Варголів музей штодень презентовати інтересности зо світу уменя. Од марца так само зачали в Меджілабірцях з проєктом Factory People.

„Coffee break є сістематічный, день што день приготовльованый концепт короткых інформацій з цільом будовати популарну музейну інформованость некунстісторічного характеру,“ повів про аґентуру Мартін Цубяк, директор музея з тым, же Музей модерного уменя Енді Варгола буде денно меджі 9.00 і 9.30 год. публіковати на своїм фанпейджі „ку ранній каві“ різны інтересности зо світу уменя і зо жывота, історії і діялности музея.

Музей од зачатку марца так само приготовив новый екукатівно-презентачный формат Factory People.

„Раз до тыждня в нім приближуєме умелецьке оточіня і людей, котры співпрацовали з Енді Варголом, рушали ся в його безпосередной близкости, взаємно ся овпливньовали, а тым овпливньовали і вывой самого уменя у світі в другій половині 20-го столітя,“ повів Цубяк.

За його далшыма словами бы музей хотів принести уменя прямо меджі людей. Інтерактівный проєкт з назвов 15 минут славы, в рамках котрого хоче Варголів музей дословно кочовати по словацькых містах і селах, бы радо зачали в апрілю. Но реалізація залежыть од актуалной пандемічной сітуації.

Фото: Ян Штовка.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА