На Лемковині нашли жытлиска нового овада з родины шаранчуватых

Найменше 15 жытлиск евроазиятицкого овада (Mecostethus parapleurus) з родины шаранчуватых нашли в Низкым Бескіді і Бєщадах. Характеристичный овад – зелена болотна кобылка, рідко появлят ся в Польщы, жыє головні на полудни Европы. Подля експертів пошырює своі засягы з огляду на лагіднійшы зимы.

Парунадцет жытлиск зеленой болотной кобылкы нашли в Низкым Бескіді, Ясельско-Коросняньскій Котлині і в Бєщадах. Пару находит ся на обшыри Маґурского Нацийонального Парку. Конрад Красонь, робітник МНП, подал, што в серпни/авґусті натрафил на овада на луках давных сел Незнайова і Тиханя, а тіж в отулині парку коло Вільхівця.

Експерт пояснят, што зелена болотна кобылка то овад, котрый любит тепло, выводит ся з родины шаранчуватых, може мати релятивні великы розміры. Самчыкы можут быти долгы на 17-21 мм, а самичкы на 24-30 мм. Овады выступуют переважні на вільгітных луках полудньовой і західньой Европы і Азиі.

Овад є яснозеленого кольору, од очы до крыл має видиму чорну ленію. Мож го найти не лем при мокрых луках, але і при берегах потоків і ярчыків. Мож на него трафити аж і в сухых місцях – в высокых травах.

В першій половині минулого столітя знали, што в Польщы овад выступує лем в Західнім Бескіді, Сандомирскій Котлині і Краківско-Вєлюньскій Высочыні. Подля К. Красоня з МНП появліня ся овадів в Польщы означат, што пошырюют засяг свого выступуваня, чому сприяют лагідны зимы і горячы літа.

Зелена болотна кобылка находит ся на червеным списку загыбаючых звірят в Польщы в катеґориі «критичні загороженых».