На Лемковині треба вольонтерів!

Записы уж тырвают, тырвают тіж і рыхтуваня, хоц до змагань, здавало бы ся, іщы вельо часу, але жебы ціла махіна, яком єст Лемковина Ультра Трейль, добрі фунґувала, уж тепер треба заняти ся єй орґанізацийом.

Лемковина Ультра Трейль то – сміло мож речы – престіжовы змаганя в літаню, якы проходят на осін на обшыри Лемковины. Мож бы навет і речы, же проходят такой на цілій єй долгости. Найдолша траса (150 км) веде од Крениці до Команчы. Час, в якым треба ся змістити, жебы были зарахуваны за тото пункты – 35 годин. Здає ся, же то вельо, беручы до увагы факт, же влони перший літач, довершыл трасу в 17 годин з минутами, але так лем ся здає, же пілтора добы то вельо… На 272 особы до влонишньой меты долетіло 194 літачів. На інчых трасах аж так великой ріжниці медже початковым чыслом стартуючых і тых, што долетіли, не было. Были тіж три інчы трасы, до котрых того рока дійде іщы єдна. Окрем пути: Лемко Трейль 30 (км), Лемко Маратон 48 і ЛУТ 70, своі силы провірити буде мож на 80 км. Тота нова траса, з Крениці до Гыровы, то пропозиция для тых, котры летіли уж в ЛУТ 70 і хотят провірити перший одтинок ЛУТ 150, або зробити го в два рокы. Старт на тій трасі буде проходил піл годины по старті ЛУТ 150, то є о 00:30 год. (добрі чытате – ЛУТ 150 стартує докладні о пілночы). Чом так? Послухайте інтервю з орґанізатором, Кжыштофом Ґайдзіньскым, якій тото пояснят (інтервю найдете в подкастах радия ЛЕМ.фм). Старты другых трас остают незмінены, подібні як мета – для вшыткых пути єст єдна – в Команчы.

Додаткова траса то не єдина зміна тогорічной едициі змагань. Для легшой лоґістикы і для поліпшыня орґанізацийных квестий, в Коросні зорґанізуване буде другє бюро змагань – то для трас ЛУТ 70, Лемко Маратон 48 і Лемко Трейль 30. Для ЛУТ 80 і ЛУТ 150 остає бюро в Креници (там тіж зачынают ся обі трасы). Орґанізаторы дают змогу платных транспортів з бюра змагань в Коросні (де треба прити по стартовий пакєт перед стартом) до місц, в котрых зачынают ся змаганя: Гырова, Івонич і Пулавы Выжні. В Коросні буде мож переночувати перед змаганями і взяти участ в цікавых пропозициях, зрыхтуваных орґанізатором, видіти Експо, а рано – доіхати на місця стартів.

Наступном зміном сут збільшены ліміты участників змагань. Влони выстартувало всумі близко 1000 літачів. Того рока буде могло іх быти аж 1700! ЛУТ 150 – 400 осіб, ЛУТ 80 – 100 осіб, ЛУТ 70 – 500 осіб, Лемко Маратон 350 осіб і Лемко Трейль – 350 осіб.

Жебы ціліст змагань могла перейти так успішні, як в двох попередніх едициях, потрібны сут вольонтеры до помочы. Мож навет выбрати найліпшу для ся роботу, а то: при рыхтуваню бюра змагань, при пакуваню стартовых пакєтів, поміч при обслугуваню іноязычных участників, при пунктах одпочынку на трасі. Подібні на старті, меті і при знакуваню трас.

За тоту поміч орґанізаторы пропонуют познаня цікавых люди, активне проведіня осіннього вікенду, але і спаня в туристичных оставинах, ідло, ґаджет змагань ЛУТ і вельо кавы… Як стратеґію, мож приняти плян – того рока быти вольонтером ЛУТ, а в будучым – участником змагань 🙂 Тогорічна, третя едиция, проходила буде в днях 21.-23. жолтня/октобра.

Пониже пізрийте на лемківскє влонишнє представництво на змаганях. Рахуєме, же і того рока Лемкы не заведут на Лемковині! А кому треба буде місце до спаня перед, по, або вчас змагань – Руска Бурса в Ґорлицях оферує дармовы нічлігы.