На Любовняньскім граді выставлюють кральовскы дорогоцінности

На Любовняньскім граді в Старій Любовні сприступнили в пятніцю 18-го юла 2025-го року нову унікатну выставу кральовскых дорогоцінностей. Постоянна експозіція під назвов Скарбниця Граду Любовня є наіншталована в бароковім бастіоні.

Як інформовала аґентуру TASR кунстісторічка Любовняньского музея Даніела Рельовска, выстава є присвячена скарбам родины Замойскых.

Про потребы выставы простор естетічно выліпшыли і шпеціално освітлили. Містность єдночасно доповнили портреты астурьской прінцезны Марії Мерседес, іспаньской інфанткы Ізабелы Бурбоньской, і прінцезны двох Сіцілій Кароліны де Бурбон. Цілково є выставленых 33 артефактів, десять собі музей пожычів із пріватных колекцій по маїтелях родины Замойскых.

„Меджі цінны предметы мож зарадити молитвенник выкладаный діамантами із майстерні Mellerio. Ішло о свадбляный подарунок кардінала прімаса Іспанії про прінцезну астурьску. Цінный предмет быв із граду почас Другой світовой войны вкрадженый, пізніше го на меджінароднім рынку із старожытностями нашов і здобыв ґроф Марцін Замойскый, котрый го наслідно передав правдивым маїтелям,“ повіла про аґентуру Рельовска.

Далшым цінным артефактом є наприклад окрашена стріберна скринка з мотівами квітів, в котрій є малый мішок із іспаньсков земльов. Із пріватной колекції мож видіти ружанець, котрый належав Кароліні Замойскій, але і далшы цінны артефактів.

Дорогоцінности на граді выставлюють ся першый раз обще. Выстава має быти припомянутьом богатой історії шляхтічного роду, але і одданьом почливости вынятковым женам, котрых долі неодділительно суть звязаны із теріторійов Словакії, інформовав музей. Выстава буде приступна до кінця 2027-го року.