На новосадьскім Меджінароднім торзі книг презентовали русиньскы выданя аж три дні

В днях 17-го аж 23-го марца 2026-го року проходив у Новім Саді традічный Меджінародный торг книг 2026. Тота подія вже веце як три декады пропаґує писане слово, културу і уменя. Ани тот рік не бракло русиньскых книжковых выдань, котры вышли в Сербії.

Презентовало ся веце выдавателів русиньской літературы, а на Меджінароднім торзі книг 2026 о русиньскых выданях бісідовало ся аж три дні.

Руска матка презентовала як перша

19-го марца на Меджінароднім торзі книг 2026 в Новім Саді одпрезентовала свої выданя членьска орґанізація Світового конґрес Русинів Руска матка. Як інформовала аґентура Рутенпрес, голова орґанізації Михайло Фейса на презентації повів, же їй выдавательство базує на трьох областях – белетрістіці, есеїстіці і науковій публіцістіці.

Руска матка представила на події наприклад книгы Вистате шерцо Іріны Жеґарац, З шерца преписане Славоміра Шанты ці Ми єднаки Мілана Добровольского Ранчера.

Як інфомровала аґентура, Руска матка влони розпочала едіцію Демистификация, в котрій як перша публікація вышов зборник есеїв, крітічных і полемічных текстів Михайла Катоны під назвов Поручена заспаному народу.

Меджі іншыма была представлена і нова научна лінґвістічна публікація з пера Наташы Перковіч а Михайла Фейсы під назвов Синхрония і дияхрония руского язика.

Руске слово буде мати округле выданя

20-го марца свої выданя презентовали Новинарьско-выдавательска інштітуція Руске слово і Інштітут про културу войводиньскых Русинів.

Новы публікації із продукції Інштітуту про културу войводиньскых Русинів представив директор Саша Сабадош. Бісідовав о книжці Вично тирва 13. май авторів Люба Раца і Олены Папуґа, але презентовав ся і Каталоґ предметох Музейней збирки Руски Керестур Любіці Отич, як і публіккація Руски идиоми, фрази и вирази Іріны Гарді Ковачевіч.

Руске слово  представило так само нову дітячу образкову книгу Даніелы Тамаш Заграда. Шеф выдавательского дому Борис Варґа на презентації припомянув, же скоро выйде з друку нова книга у выданю той інштітуції, котра собі припише округле чісло 100, і то за послідніх вісем років, одколи было реформоване одділіня выдавательства Новинарьско-выдавательской інштітуції Руске слово.

Презентовав ся і зборник Studia Ruthenica

21-го марца на торзі презентовали новы выданя і членове Коордіначного одділіня інштітутів про языкы, літературу і културу окремых народностных меншын.

Русиньскы выданя Інштітуту про русиньскый язык, літературу і културу – науковый зборник Studia Ruthenica, як і каталоґ із посліднього вытварного пленеру під назвов Стретнуце у Боднарова, представила секретарь інштітуту Іріна Папуґа.

Фото: Рутенпрес.