На Підкарпатю вышов новый літературный алманах

Як уж стало звыком, ку кінцю календарьного року на Підкарпатю выходить літературный алманах, котрый презнетує найновішу творчость сучасных русиньскых авторів із того краю.

Ани тот рік не є вынятком. Як інформовав в суботу 22-го новембра 2025-го року Юрій Шиповіч, голова Русиньского културолоґічного клубу, в тых днях вышов новый Алманах днешньої русинської літературы на 2025-ый рік. То вже шестый річник той публікації, яка выходить од 2019-го року.

В попередніх роках аламанах выдавали вєдно Закарпатьске областне научно-културолоґічне общество імени Александра Духновіча i Русиньскый културолоґічный клуб, тот рік є выдавательом лем друга із споминаных русиньскых орґанізацій, клуб. Алманах выдали в ужгородьскім выдавательстві РІК-У і має 66 сторінок.

В Алманаху днешньої русинської літературы на 2025-ый рік суть творы 15-ох авторів. „В днешній тяжкый час, коли уже третій рік на Україні іде война, писати художны творы має дяку і силу не каждый. Зато многы перестали тото робити. Коли довкола хаос і смерть, не вшыткым ся пише. Радує тото, же дакотры із матеріалів того річника суть неоцінимима,“ інформовав голова Русиньского културологічного клубу Шиповіч.

За словами Юрія Шиповіча радує і тото, же в алманасі тот рік публікують ся і новы авторы, наприклад Валерій Гаврилишин із своїма стихами і перекладами на русиньскый язык із україньского.

„Наповнює оптімізмом і тото, же в тім річнику печатають ся новы авторы. То молоды русиньскы поеты Артур Сегеді і Ярослав Штефко. І най буде, же обидвом леґіням іщі треба робити над словом, при добрій дяці, мають перед собов творчу серенчу.“

Юрій Шиповіч підкреслив, же алманах бы не міг быти выданый, кебы не было підпоры, членів Русиньского културолоґічного клубу, найвеце Анны Меґелы і і професора Маріяна Токаря, але і фінанчной підпоры меценатів, котрых было веце. „Вдяка тым людям жыє і фунґує наша карпаторусиньска култура. Бо докля языком говорять і пишуть – він буде екзістовати, а коли суть люди, котры тото підтримують фінанчно, шансы на ренесанс міцніють.“