На польско-словацкым пограничы буде ся вельо діяло

Зроблят новый туристичный пут, якій получыт Ожынну з Розтоками, выремонтуют орґаны, зорґанізуют концерты, спектакль, печатаный буде альбом, поставлят фіґуру ката в Бічы. То лем част діянь, якы реалізуваны будут в рамках підписаных договорів.

В Повітовым Старостві в Яслі в віторок, 3. марця, підписано штырі дальшы умовы на реалізацию мікропроєктів в Проґрамі Інтерреґ Польща-Словация 2014-2020.

Розвиток ясельского повіту і окресу Свидник

Першый з проєктів буде Ясельскє Староство реалізувало з Піддукляньскым Едукацийным Центром во Свиднику. В рамках задачы «Розвиток туристичного потенциялу ясельского повіту і окресу Свидник» плянуют утворити трансграничный туристичный пут, якій получыт Ожынну з Розтоками. По словацкій страні проєкт обнимат модернізацию синього шляку од Розток в страну границі з Польщом та фраґмент червеного шляку до синього з Розток до місця, де лучыт ся з рыхтуваным жолтым шлякм. Зроблят тіж рекреацийну інфраструктуру, значыт стоякы на роверы, альтаны, тоалеты ітп.

Діяня по польскій страні обнимают утворіня нового туристичного шляку та природничой стежкы, котрых початок буде при Осередку Еколоґічной Едукациі в Ожынній. Будут інформацийны таблиці про рослинніст і звірята, заплянувано і пошыріня функцийональности мобільного путівника ясельского повіту. Зорґанізуют едукацийны варштаты з обшыри фотоґрафіі і фільму про природу, а тіж спортовы варштаты промуючы активне ведіня свобідного часу.

Літургічна музика, реліґійны пісні

Проєкт «Культурна спадковина польско-словацкого погранича; літургічна музика, реліґійны і поломницкы пісні» будут реалізувати римокатолицкы парохіі в Славенціні і Пряшові. Реалізация проєкту обнимат ремонт забытковых орґанів з 1880 р. в костелі св. Катрены в Славенціні. По реновацийных роботах інструмент, окрем до літургічных ціли, буде удоступненый артистам. В костелі пройде орґановый концерт артистів зо Словациі та учытелів музичной школы в Яслі. В костелі в Пряшові буде зорґанізуваный концерт клясичной і реліґійной музикы. Плянуют тіж печатати книжку з історийом реліґійных і поломницкых пісен польско-словацкого погранича.

Ґорлиці і Біч будут спілпрацувати з Бардийовом

Міста Ґорлиці і Бардиів зреалізуют проєкт «Познай ґеолоґічны скарбы польско-словацкого погранича» – в його рамках зорґанізуют популярнонаукову конференцию з обшыри ґеотуристикы, выдадут альбом і зорґанізуют світло-ласеровый спектакль пн. «Світло з Землі». До промоциі міста заанґажуют тіж знаного інфлюенсера. Окрем того буде мож видіти мобільну выставу знимок атракций ґорлицко-бардиівского погранича. «Завдякы реалізуваным нами проєктам, Ґорлиці сут штораз барже розпознавальны на туристичній мапі Польщы» – бесідує Рафал Кукля, бургомайстер Ґорлиц. «Особливо залежыт нам на тым, жебы промоция мала не лем загальнопольскій засяг, але тіж медженародный, одтале реалізация трансграничных проєктів» – додає.

Послідній з проєктів «Мастер святой справедливости на карпатскых шляках бескідників Біч-Бардиів» ґарантує, же поставлена буде фіґура ката на рынку в Бічы, зроблена музейна експозиция в катівскій тюрмі ци упосажена реконструкцийна ґрупа.

Фот. УМ Ґорлиці