Намісто великых очековань реалполітіка

В недавных чеськых парламентных вольбах выграв рух ANO бывшого чеського премєра Андрея Бабіша. То, же уж раз премєром быв, треба тримати в голові. Жебы не чекати, што не є реалне.

По перемозі Бабіша головно в медіях, котры суть повязаны із Закарпатьсков областьов Україны, вышли многы статі. Тоты, кебы сьме їх мали сумарізовати, были о тім, же Бабіш має закарпатьске коріня, україньске коріня, походжіня, і так далше. В діскусіях на соціалных сітях ся пак горды Русины били о то, же не україньске, лем русиньске коріня, припадно із нього рівно зробили Русина.

Треба собі пояснити. Є правдов, же матірь Андрея Бабіша была із Ясині. Народила ся у 1927-ім році, на Підкарпатьскій Руси, в складі Чехословакії, по Другій світовоій войні родина оптовала до повойновой Чехословакії, і так коріня Андрея Бабіша треба глядати на Підкарпатю, не в Закарпатю, котрого не было.

Мати Андрея Бабіша была із фамелії Шайбнер. То родина Швабска – карпатьскых Німців, і так він не є ани русиньского, уж нияк нє україньского походжіня. Лем є із єдного боку карпатьскый Німець. Отець Андрея Бабіша – Штефан, быв із міста Глоговець на Словакії, і быв то чістый Словак.

Кедь сьме збуряли міфы коло походжіня Андрея Бабіша, зістав нам лем єден факт. Половина його родины походила із Підкарпатьской Руси.

Вєдно із тыма полоправдами, публікованыма на споминаных порталах, могли бы дакотры простішы чітателі, а може і авторы даных статей, думати, же выгра Андрея Бабіша може якось помочі Підкарпатю, та і цілій Україні. Не дайте ся высміяти.

Андрей Бабіш не має жаден інтерес о тото, жебы якось протежовати край із котрого была його мама, а уж нияк не має жаден інтерес ставляти на перше місце Україну. Трампіста Бабіш має на першім місці Чеську републіку.

Вертаме до того, же Бабіш уж раз премєром быв. Было то в роках 2017 аж 2021. Кілько раз чеська діпломація занимала ся наприклад нашыма, русиньскыма інтересами на Підкарпатю? Кілько раз за його премєрованя одкрыв ся вопрос непризнаваня прав Русинам на Україні. Цілково ани раз. Тото абсолутно не было його аґендов. А не думам, же бы то мало стати його аґендов теперь.

Што до Україны, Андрей Бабіш уж в кампани перед вольбами оперовав україньсков картов. Бісідовав о обмеджіню помочі, головно той збройной ініціатівы, котру хоче зрушыти, але і о далшых ділах. Першорядый є про нього чеськый граждан, і Чеська републіка. Про них в першім шорі мусять быти грошы, не про Українців, не про Україну.

А по вольбах так само повів, же Україна подля нього не є нияк приготовлена на вступ до Европской унії, чім ся веце приклонив ку позіції Віктора Орбана. Іщі і словацькый премєр Роберт Фіцо бісідує о тім, же Словакія нияк не буде боронити вступу Україны до Унії, дає Україні европскы надії, без огляду на то, як серьйозно то думать, но Бабіш таке дашто одкрыто спохыбнює.

Навеце, резултатами волеб є примушеный іти до коаліції, што він сам не хотів, хотів владнути сам, а то іщі до такой коаліції, де суть одкрыто антіукраїньскы політіци.

Од Андрея Бабіша не мож нияк чекати даякы великы чуда, і кебы мав не знаме яке україньске коріня, што не має. Він уж раз як премєр вказав, же то про нього не є тема, днесь із контраверзнов коаліційов, і членством в европскых патріотах ся то не зліпшыть. А нияк не має, ани не буде мати інтерес о Русинів.

Намісто великых очековань треба раховати з реалполітіков, котру Андрей Бабіш не робить першый рік. Навеце, і кебы Андрей Бабіш властныма руками пхав Україну до Унії, без вызнаня Русинів за окремый народ, без прав про Русинів на Україні, што його не інтересує, бы нам то было так хосенне, як козі ніж.

Статя была написана як коментарь „Вступне до контроли“ лемківского радія lem.fm. Жрідло фотоґрафії: Pixabay.com.