Націоналне свято тот рік в Будапешті

Вседержавне русиньске самосправованя в Мадярьску шторік в місяці май орґанізує Русиньске націоналне свято, яке є скапчане з передаваньом Премії імени Антонія Годинкы. Каждый рік тота подія проходить в іншім місті.

Тот рік Русиньске націоналне свято одбуде ся в суботу 24-го мая 2025-го року, і Русины з Мадярьска одсвяткують свій праздник в столиці країны – Будапешті.

Головным покровительом той події є Мікловш Шолтес – державный секретарь Державного секретаріата Канцеларії премєра з вопросів реліґійных і націоналных капчань, котрый покровительство перевзяв вєдно із Віров Ґіріц – представительков Русинів у Парламенті Мадярьска.

Свято почне в пополідняйшых годинах молитвов Акафісту, котрый буде одслуженый в Ґрекокатолцькій церькви святого Михаіла, на уліці Бабейр. Далше буде културный проґрам продовжовати в просторах Културного центра імени Йожефа Атілы в Будапешті.

Із святочныма приговорами будуть выступати Віктор Крамаренко – председа Вседержавного русиньского самосправованя, Каталін Сілі – головный радник мадярьского премєра і бывша предситателька мадярьского парламенту, і Золтан Фюрєш – заступник державнoго секретаря Державного секретаріата Канцеларії премєра з вопросів реліґійных і націоналных капчань.

Тот рік в рамках културного проґраму привітають на Русиньскім націоналнім святі гостів із Словакії. Із Гуменного прийде выступати Фолклорный колектів Хемлон.