Найкрасшы пісні Анны Порачовой. Солистка выпустила нову платню

Вчера, русиньска солистка Анна Порачова заявила про выпущыня свойой новой платні. Тоту радістну подію оголосили єй любителі на фейсбкувоым профіли, присвяченым тій співачці.

З короткого анонсу дознаєме ся, же нова платня Порачовой – Найкращы пісні Анны Порачовой, то – як выходит і зо самого наголовка – збірка дотепершіх найліпшых, найпопулярнійшых, найбарже ціненых пісен і співанок выконуваных Порачовом серед русиньской, словацкой, ай і дальшой публикы. О акомпаніямент на найновшій платни выстарала ся співачка в Народній музыці Стана Балажа, а і до того  спілпрацувала при нагрываню музыкы і співу до пісні вєдно з дівками Порачовой (Анном і Евом) та внуком Любком. На платніи найдете 15 творів (русиньскых і шаришскых), котры про декотрых не будут ничым новым, бо як спомнено горі, співачка вертат до коренів. Хоц слова співанок ся не міняют, смотрячы з музычной перспективы, все мож достеречы дашто нове.

Порачова народила ся в русиньскым селі Кыів, в окресі Стара Любовня. То співачка, котра выконує русиньскы, шаришскы та духновны пісні. Порачова є лавреатком центрального чехословацкого перегляду пісні Маковицка Струна. Через рокы свойой музычной діяльности была звязана з такыма ансамблями як Карпатянин, Шаришан, Ториса, Земплин ци Сабиновчан. Співачка выступує в вельох проєктах, м.ін. з OĽUN-ом (Оркєстра Народных Інстументів Словацкого Радия), а посліднім часом єй голос маме змогу чути в ансамбли Кандрачовці. В своій музычній карєрі Порачова выпустила уж 6 сольовых платен.

Сміло мож речы, же одтепер Анну Порачову мож чути вєдно з Народном музыком Стана Балажа – знаныма на Словациі гудаками, на сцені выступуючыма од 2007 рока. Капеля є лавреатом вельох конкурсів так дома, як і заграницьом, а рахуючы платні, якы выдали при подібній спілпрацы як з Порачовом, є іх парудясят. Іх ориґінальний інструментальний склад то: першы і другы гушлі, басы, гармонія, а і, што основне про Пряшівщыну, цимбалы.

На днешній ден на офіцияльным сайті солисткы неє іщы інформациі о новій платни, але як знаме з фейсбука, неодолга мож гын зазерати і сміло придбати. Пишучы на адрес поданий на сайті, уж тепер можете старати ся о нову плятню –  Найкращы пісні Анны Порачовой.