Не жыє Филип Іконяк – Русин з Явірок

На Шляхтівскій Руси поховано Филипа Іконяка – активного Русина, бодай посліднього, котрий одкрыто признавал ся до свого походжыня, жыючого в кругу штырьох сел: Явірок, Шляхтовы, Білой та Чорной Воды.

Бл. п. Филип Іконяк вродил ся в рідных Явірках, де до 1945 рока прожывала родина Іконяків. Пак переселили ся на Совітску Украіну, одкале в 1957 році чудом подарило ся ім вернути, але уж не на Шляхтівску Русь, а на західні землі Польщы. По часі, отец Филипа Іконяка вернул до рідного села, де побудувал нову хыжу.

Покійний активно анґажувал ся в промоцию русиньской культуры серед польскых днес жытелів штырьох сел Шляхтівской Руси. Од років занимал ся ратуваньом осталых русиньскых крестів, капличок, котры доднес засвідчают про бывшых жытелів Явірок, Шляхтовы, Білой та Чорной Воды. Знал бесідувати в рідным русиньскым языку, котрий в примірі Шляхтівской Руси мал цікавий діалект і ріжныл ся од того, якій знаме з західньой ци середньой Лемковины. Мож го прібувати порівнувати до бесіды, яком послугуют ся Камюнчане – жытелі поблизкого села на Пряшівскій Руси. Часто, як раз по лемківскы проповідал і оповідал цікавы істориі на проходячым што рік в липци/юлию Пєніньскым Фестівали Гірскых Культур Лемків, Руснаків і Ґуралів в Явірках.

Бл. п. Филип Іконях вмер 4. січня/януара 2017 р.

фот. за www.podhale24.pl