Неодолга зачынат ся «Світ під Кычером» – світовой реномы Медженародный Фольклористичный Фестіваль

Уж в будучым тыжни зачне ся 28. едиция Медженародного Фольклористичного Фестівалю «Світ під Кычером», орґанізуваного Стоваришыньом Лемківскій Ансамбль Пісні і Танця Кычера. Подія популяризує богатство традиций, музикы і танця великых і малых народів світа.

Тогорічна едиция, слідом попередніх років, одбуде ся выключні на західніх землях. Бывали рокы, што фестіваль гостил тіж в горах і концертувал так по векшых місточках, як і по лемківскых селах.

Тепер концерты одбудут ся в чысленных місцевостях нижньошлезского реґіону – од Ліґниці і Ліґницкого Поля по Польковиці, Олесницю, Лісєц, Волів, Шпротаву, Поляницю і Рудну, всядиль там, де жыє лемківска спільнота.

Присутны на концертах будут мати нагоду познати ріжнорідніст культур з дальшых і близшых закутин цілого світа – Арґентины, Пілнічной Македоніі, Ґвінеі, Портуґалиі, Костарикы, Украіны, Косова і Канады. З лемківском спадковином запрезентує ся ґазда – ансамбль Кычера.

«Фестіваль Світ під Кычером то не лем презентация лемківской культуры, але головні плятформа меджекультурного діалоґу і выміны досвідчынь. Нашом місийом єст лучыти люди через штуку, промуваня традиций і будуваня мостів порозумліня. Просиме вшыткых до спільного святкуваня ріжнорідности і красы культуры на Нижнім Шлеску» – просит Юрий Стариньскій, директор МФФ «Світ під Кучером», ведучый Стоваришыня ЛАПіТ Кычера.

Участникы фестівалю будут мати нагоду видіти видовисковы переходы короводів ансамблів, взяти участ в ремесельных варштатах і показах та в інтерактивных анімациях, якых задачом буде вказати богатство і розмаітіст світовых традиций.

Што треба підкрислити, то дві попередні едициі фестівалю (з 2022 і 2023 років) Медженародна Федерация Фестівалів FIDAF узнала за єдны зо штырьох найліпшых на світі.

Фестіваль фінансуваный є з середків Міністра Внутрішніх Справ і Адміністрациі, Міністра Культуры і Нацийональной Спадковины, Маршалківского Уряду Нижньошлезского Воєвідства, Ґміны Ліґниця та Фундациі KGHM.

Фот. Пресовы материялы орґанізатора