Ні, конкурсу «Місс Лемковины» не выдумали на першых Ватрах…

Неєден з нас певно си думал, што выбераня найкрасшой Лемкыні, а пак і найгардшого Лемка, выдумали на першых Лемківскых Ватрах в Горах. І думали так дотепер члены нашой підредакциі, котра все під чымси лем стоіт, котра фурт лем глядат, чого бы ся ту хватити.

Не было легко, але взяли сме до рукы конец-кінцьом дальшый номер нашой просвітительной ґазеты «Лемко», ч. 24, котра вышла дня 4. жолтня/октобра 1934 рока в Креници.

Нашым очам вказало ся оголошыня про орґанізацию «Выборів Мис-Лемкыни і найкрасшого Лемка». Сме дораз были в великым шоці. Выпередили сме ачий цілосвітовый конкурс Miss World, котрый першый раз одбыл ся аж в 1951 році! Значыт, як все – вшытко зачало ся од нас.

Лем цікавит нас, што товды было в моді? Ци такы выспортуваны і фіт парадниці, ци може такы барже робітны ґаздыні? Ци леґені мали быти такы барже мускулярны, такы прямо з ґаздівского обыйстя, ци радше выспортуваны і по вельох тренінґах в америцкых клюбах? А што з ґамбом такого фраіря? Радше з баюсом ци оголеный? А може лем така тридньова борода? Бо про хлопа з ліса хыбаль ся товды іщы ани не думало… Одповіди глядайме дораз вєдно.

З посвяточным і теплым поздравом,
– підредакция фафринді і сконфіскуваного

Выбор Мис-Лемкыни и найкрасшого Лемка!

В суботу, дня 6. жолтня 1934. о год. 7. вечер, устроює Лемко-Союз в Поворознику в домі Чит. им. М. Качк. вселемковску, велику забаву с танцами и розличныма милыма несподіванками, а также выбор мис-Лемкыни и найкрасшаго Лемка на 1934 р. ВЫБРАНА ПАРА ДОСТАНЕ КОРОНЫ И ЛЕНТЫ С НАПИСАМИ.

Обовязуют народны строи для дівчат и для хлопцов в міру возможности.

Села и читальні присылайте своих красавиц и красавцов! Снимкы выбраной пары будут рососланы вшиткым газетам рускым, краєвым и американскым.

Буфет заосмотреный добре! Меринді не потреба! Ночлегы даром ала треба их замовити перше писемно в редакции „Лемка”. Желізнодорожна станция в місци.

Вход 99 гр.