Ніч музеїв і ґалерій в Музею русиньской културы

Словацькый народный музей – Музей русиньской културы в Пряшові уж традічно залучать ся до цілоевропской події з назвов Ніч музеїв і ґалерій. Тот рік подія буде проходити в суботу 17-го мая 2025-го року.

Як за музей інформовала Яна Трущіньска, навщівници можуть ся тішыти на богатый проґрам, котрый в тот день буде од другой пополідне аж до десятой годины вечур. Почас події буде мож іщі видіти і дочасну выставу, котра є наіншталована в просторах музея. Іде о выставу під назвов Меджі, на котрій презентують ся штуденты Школы умелецького промыслу в Пряшові.

Про найменшых музей рихтує творчі ательєры, в рамках котрых будуть вырабляти бавкы. Кедьже 2025-ый рік є выголошеный за Рік русиньского языка, в проґрамі під назвов Присвячене Маші буде споминати ся на выняткову русиньску прозаічку Марію Мальцовску, лавреатку Премії Александра Духновіча за русиньску літературу, котра нас опустила перед пятьнадцятьома роками. Їй буде присвяченый і концерт класічной музикы в інтерпретації школярів Пріватной основной умелецькой школы ДАМА в Пряшові.

Музичны гості проґраму заінтересують і тых, котры люблять модерну музику, як і тых, котры радше слухають наш фолклор. В рамках Ночі музеїв і ґалерій выступить русиньска гіп-гопова ґрупа Calibri Gang, а прийде і Фолклорный колектів Маковіця зо Свідника.

Почас цілого дня буде мож абсолвовати і коментованю переглядку вшыткых експозіцій СНМ – Музея русиньской културы в Пряшові. Ніч музеїв і ґалерій в русиньскім музею тот рік підпорило Місто Пряшів.