Никыфор, што вымалювал ліпшый світ

Мария Стшелецка, авторка ілюстраций про діти, якы односят ся до лемківского світа, тым разом выпустила книжочку, яка має оповідати наймолодшым о жытю і творчости найбільшого лемківского маляря примітивісты – Епіфана Дровняка (Никыфора Креницкого).

Наголовок книжочкы короткій, але і ясный – «Никыфор», кєд же публикация як раз має представити креницкого артисту.

Вымалювал ліпшый світ

Выдавництво Лібра PL на своім сайті веде уж промоцийну передпродаж книжочкы. Єй премєра буде 27.  мая,  зато першы высылкы будут реализуваны по тым терміні. Можете єй придбати безпосередньо на сайті выдавництва. Книжка чыслит 56 стран і має тверду окладинку.

«Што мож зробити маючы під руком так скромне нарядя? Шкільны фарбкы в основных кольорах, олувкы, кредкы, клий, дзякавкы, стругачку, фляшку з водом, печаткы з підписом і кавальці паперя? Мож сотворити цілый світ, горы і лісы, села і міста, красны будівлі і виючу ся желізницю, чудовы заходы сонця, похмарены дни і звіздны ночы. Мож намалювати добрых і злых люди, цілы гурмы святых і себе самого. Такым нарядьом, Никыфор, маляр з Крениці працуючы каждого дня, вымалювал власный, ліпшый світ…» – пише ся во фраґменті книжкы.

Заінспірувана Лемковином

Мария Стшелеска, артистка, творчыня анімаций, подорожничка, час-до-часу жытелька нашых Гір, оповідат о бывшій і дншеній Лемковині. То тіж докторка плястичных наук і авторка попередньой ілюструваной книжочкы про діти пн. «Бескід без кіту», яка радо была принята і серед лемківской соспільности, кєд же оповідат в непересічный спосіб о скомпликуваній польскій спадковині, а в тым примірі польско-лемківскій спадковині.

Стшелецка хотіла в тот спосіб привести памят на тых, што были перед осадниками, значыт на автохтонів – Лемків. Влони вказала ся дальша част пн. «Бескід без кіту. Зима».

Книжка о вызначным Лемку то дальшый примір того, што інтересує авторку. Надієме ся, же кєд лем ґу вам приде публикация, буде тішыла око не лем ілюстрациями, але і змістом.