Нова експозіція о Мукачові чехословацького періоду

В пятніцю 23-го мая 2025-го року в Мукачовскім історічнім музею одбуде ся одкрытя новой музейной експозіції під назвов Мукачово за часів Чехословацькой републікы (1919 – 1938).

В рамках новой експозіції будуть навщівници годны познакомити ся із темами з історії Мукачова 20-ых і 30-ых років минулого столітя, як наприклад окружный уряд, банкова сістема, посадкове командованя ці ряджіня транспорту.

Як інформовала пресова служба Мукачовской містьской рады, експозіція є резултатом роботы співпрацовників музея, котры позберали інформації про кину о історії Мукачова в рамках чехословацького періоду.

„Якраз тото баданя і надхнуло на створіня новой выставы,“ пише пресова служба Мукачовской містьской рады.

„Довгый час науковый робітник музея Олександр Цільо досліджовав чехословацькый період, конкретно рокы 1919 аж 1938. В нашім музею дотеперь не была присвячена комната якраз тому періоду,“ інформовав директор Мукачовского історічного музея Михайло Белеканич.

„Зато про нас то было інтересне. Почас дакілько років мы штудовали різны матеріалы, документы,  грамоты, выображіня печаток, портреты. І так за рокы назберала ся велика колекція матеріалів. Подарило ся нам выдати примірник книгы про Мукачово в періоді Чехословацькой републікы. На основі той книгы у нас выникла ідея створити експозіцію,“ закінчів директор музея Белеканич.

Експозіція обсягує понад двадцять панелів. Головны написы суть на україньскім, чеськім і анґліцькім языку. Нова експозіція є наіншталована в історічнім мукачовскім замку Паланок.