Новым говорцьом за Русинів у Парламенті Мадярьска став Віктор Крамаренко

В неділю 12-го апріля 2026-го року одбыли ся в Мадярьску парламентны выборы. Окрем того, же мадярьскы гражданы вырішыли о тім, же по 16-ой роках скінчіла влада Віктора Орбана і його владного блоку Fidesz-KDNP, і двотретинову, конштітучну векшыну здобыв Петер Мадяр із свойов партійов TISZA, мадярьскы парламентны выборы были і о выбераню новых представителів за народностны меншыны.

Kандідачны спискы могло подати 13 офіціално вызнаных народностных меншын, котры можуть мати свого представителя в Парламенті Мадярьска. Зареґістрованых было лем 12 кандідачных списків.

Свої кандідатуры подали вседержавны самосправованя Булгарів, Ромів, Ґреків, Німців, Румунів, Хорватів, Поляків, Армянів, Русинів, Словенів, Українців і Словаків. Вседержавне самосправованя Сербів не зареґістровало кандідачный список.

Нихто не здобыв депутата

В Мадярьску може мати офіціално вызнана народностна меншына в парламенті рядного депутата або говорцю. Жебы здобыти рядного депутата, котрый має право голосовати в парламенті, єден кандідат бы мусив здобыти 20 аж 25 тісяч голосів.

Тот рік не подарило ся то ани трьом найвекшым меншынам – Ромам, Німцям і Словакам. В припаді Ромів, котрых ся голосить за списованьом жытелів із 2022-го року майже 210 тісяч, голосовало у меншыновых выборах понад 44 тісяч людей, но лем нецілых 19 тісяч голосів было платных.

Понад 22 тісяч членів німецькой меншыны, із понад 142 тісяч приголошеных в списованю, голосовало у меншыновых выборах за свого представителя, но лем дашто веце як 17 800 было платных голосів. При Словаках, котрых ся приголосило нецілых 30 тісяч, є несподіваньом, же в меншыновых выборах голосовало лем 1 132 людей, із чого лем 884 голосів было платных.

Є можливым, же меншыны тот рік овпливнило і то, же дали пріоріту партійным выборам а підпорі Петра Мадяра або Віктора Орбана. Бо сістема є наставлена так, же покля ся запишете до меншыновых выборів, не голосуєте уж за партійны спискы до парламенту.

І так в далшім функчнім періоді Парламенту Мадярьска будуть мати вшыткы меншыны лем говорцю. Говорця має вшыткы права депутата в пленумі окрем права голосовати. Но каждый говорця автоматічно стане членом народностного парламентного комітету, де уж і голосує.

Русины мають нового говорцю

Ку Русинам приголосило ся у 2022-ім році 7 111 людей, і выберали лоґічно, так як в попередніх функчных періодах, свого говорцю, кедьже не мають доста голосів, жебы здобыти рядного депутата. Голосовало 705 людей, 412 голосів было платных.

Кандідачный список Вседержавного русиньского самосправованя про тоты выборы мав вісем кандідатів. Лідером списку быв Віктор Крамаренко, председа Вседержавного русиньского самосправованя. За ним были Віктор Ґіріц, Петер Гладинець, Віктор Дулишковіч, Янош Кожняньскый, Ґабор Варґа, Евелін Скиба, і Анастазія Тіводар.

Уж перед выборами было ясным, же на посаді говорцю буде нова особа. Віра Ґіріц, котра на тій посаді была три функчны періоды (рр. 2014 – 2018, 2018 – 2022 і 2022 – 2026), і была обще першов представительков Русинів у мадярьскім парламенті, в тых выборах уж не кандідовала. Новым говорцьом став лідер списку Віктор Крамаренко.

Віктор Крамаренко є родаком із Берегова на Підкарпатю. Од 1982-го року, із малыма перервами, жыє в Мадярьску із родинов. У 2010-ім році залучів ся до русиньского руху в Будапешті, в 14-ім районі, і став там председом русиньского самосправованя. У 2014-ім році восени першый раз быв выбраный председом Вседержавного русиньского самосправованя, на тій посаді є три функчны періоды аж дотеперь.

За нашыма інформаціями по наступліню до парламенту Віктор Крамаренко одыйде із функції головы Вседержавного русиньского самосправованя.