O Словнику, ідеях і його задачы – запрошыня на стрічу до Кракова

«Контекстуальный словник лемківского языка» – бо така є полна назва двотомовой публикациі, яка містит точно 34612 госел – лемківскых слів, уж єст доступный, могли сте уж го придбати. Подібні є з нарядьом, якє фунґує на основі опрацуваных госел – модерном плятформом lemko.tools.

Словник як діло, процес опрацуваня і выданя котрого занял в сумі 11 років, буде мал свою офіцийну премєру. Подія, яка буде нагодом оповіджыня о тым, якы ідеі присвячували выданю першого такого лемківского словника (констекстуального), одбуде ся 20. марця на Ягайлоньскым Університеті, в Collegium Maius.

О 15.00 год. зачне ся стріча з редакторком Словника проф. Оленом Дуць-Файфер і членами словникового ансамблю, якы м.ін. опрацовували словниковы госла. В дискусиі участ возмут тіж проф. Мацєй Рак (языкознавця, выкладовця в Катедрі Істориі Языка і Діалектолоґіі Выділу Полоністикы ЯУ) і проф. Генрик Фонтаньскій (філолоґ, языкознавця, выкладовця Шлезского Університету, спілавтор з Мирославом Хомяк «Ґраматикы лемківского языка»).

Авторы словниковых госел будут оповідати о ідеі і працах над словником. «11 років великого – превеликого труду. Перше 5 років з Ансамбльом, якого праца є основом Словника і якому щыро дякую: Марті Ватраль, Варварі Дуць, Олені Дуць, Севериянови Косовскому, Наталиі Малецкій-Новак, Павлови Малецкому, Анні Масляній і Моніці Тылявскій» – оповідала внет по печатаню проф. Олена Дуць-Файфер.

В рамках проґраму промоциі публикациі одбуде ся выступ ансамблю Лада і музичного дуету Дариі Кузяк та Ольгы Стариньской. На подію просят Ягайлоньскій Університет, Выдавництво Академіцка Книгарня, в рамках котрого словник ся вказал (з сериі Scripta Lemkoviana) і Музей Ягайлоньского Університету.

О тым, якій є Словник, в якій спосіб были творены госла, якы сут його задачы і функциі, проф. Дуць-Файфер оповідала уж вступні при участи проф. Юстины Олько в бесіді записаній Академіцком Книгарньом (мотузок долов).