Обзерач Природы #100 – Послідня вандрівка через нацийональны паркы Польщы

Дошли сме до такого моменту, котрый все приходит – до кінця. В найблизшу пятницю (6. марця, о 13.00 год.) емітуваный буде послідній одтинок сериі Обзерача Природы, в котрій оповідал єм слухачам о нацийональных парках в Польщы. Де поіхаме на сам конец той пригоды? В Свєнтокшыскы Горы!

Тот третій найстаршый нацийональный парк хоронит вынятковы горы недалеко міста Кєльці. Призриме ся кус красі той части Польщы і одкрыєме іщы раз, чым сут курумы та як возникают. Свєнтокшыскы Горы то тіж захоплююча ґеолоґія, о котрій тіж (як ґеолоґ) очывидно оповім.

Кінчыме тоту серию, не бесідуючы нич о трьох інчых нацийональных парках – Татряньскым, Пєніньскым і Біловежскым. Лишыл єм іх і не посвятил ім ниякого одтинка, але не бійте ся. Іщы там вернеме. Правдоподібно осіню, коли вернут тіж новы одтинкы Обзерача Природы. А о чым конкретні буде товды бесіда? О ґеолоґіі! В 101. одтинку зачнеме студиювати основы той цікавой наукы на примірах скал так з Татр, як і з Пєнін. Покля што приде нам вшыткым на тото пождати пару місяців, а до того часу желам вірным слухачам Обзерача Природы вельо сонця ярю і літом!

До стрічы на радийовым і… ґеолоґічным шляку!

джерело знимкы: Якуб Зиґмунт i Якуб Галун (Wikimedia Commons, CC BY-SA 3.0)