Обзерач Природы #64 – пятниця, 13.00 год.

В Обзерачу Природы уж сме експлорували цілком велику част Лемковины, але прецін не мож забывати о Чужыні. Думам, же вельох слухачів з околиц Нижнього Шлеска з охотом бы послухалo о природничых чудесах, якы мают в себе, на місци. Найновшый одтинок авдициі єст як раз одповідьом на такє запотрібуваня. Поіхаме адже глядати найстаршого граду в Польщы. Де такій ся находит?

Жебы го найти, мусиме поіхати до малого і урокливого місточка Влень, якє обливат з трьох сторін ріка Бубр (поль. Bóbr). То там, на невеликій гірці стоят останкы муруваного замку з ХІІ столітя! Не лем істория того місця єст полна інтриґ, але тіж його ґеолоґічне положыня робит вражыня на туристах. З трудом прецін найдеме подібный замок, котрый был поставленый на скалах припомінаючых… лявовы подушкы.

Просиме слухати Обзерача Природы в найблизшу пятницю, 29. листопада/новембра, о 13.00 год. Одтинок буде повтаряный в суботу, 30. листопада/новембра о 7.00 год. і в віторок 3. грудня/децембра о год. 15.15. До стрічы на (радийовым) шляку!

джерело знимкы: Gswito, Wikimedia Commons, CC BY-SA 4.0