Обзерач Природы #92 – Розточаньскій Нацийональный Парк

Уявте собі реґіон, в котрым лісы занимают більше як 93% його обшыри – такій єст як раз Розточаньскій Нацийональный Парк, до котрого поіхаме в найблизшу пятницю. Призриме ся вшыткым екосистемам, якы можеме в ним стрітити. Бесіда буде о старых лісах, побудуваных чловеком ставах і ріках, котрых гев не бракує.

Розточаньскій Нацийональный Парк робит ся штораз барже популарным пунктом на мапі Польщы. Власти Парку добрі о тым знают і прирыхтували вельо атракций на туристів – природничы шлякы ци місця для купаня. В проґрамі передам Вам основны інформациі, што мож робити, кєд захочете провести собі там вакациі.

На розточаньску пригоду прошу сердечно в найблизшу пятницю 9. січня/януара о 13.00 год. Проґрам буде повтаряный в суботу 10. січня/януара о год. 7.30 та в середу 14. січня/януара о год. 4.30.

До стрічы на (радийовым) шляку!

джерело знимкы: Якуб Зиґмунт