Обзерач Природы #99 – Великопольскій Нацийональный Парк

Помалы ідеме до кінця нашой сериі Обзерача Природы, в котрій вандруєме по нацийональных парках Польщы. Были сме уж праві во вшыткых. 19 тыжнів тому зачали сме подорож од Низкого Бескіду, пак ідучы через торфяникы Поліся, доріча Бєбжы ци дюны над берегом Балтийского Моря. В найновшым (передпосліднім) одтинку проґраму поіхаме в околиці Познаня. Што там інтересуючого може нас стрітити?

На полудне од найбільшого міста західньой Польщы находит ся Великопольскій Нацийональный Парк. Основаный был аж по ІІ світовій войні, в 1957 році, хоц уж перед войном тырвали роботы над створіньом даякой формы охороны природы в тій части державы. Як повіл проф. Адам Водзічко – обшыр тота єст правдивым скансеном поледовниковых форм і жывым музейом природы!

Сесы слова доднес сут повтаряны, бо тисячы любителів вандрівок приізджат гев спацерувати посеред густых лісів і над урокливыма озерами. Більше о красі Великопольского Нацийонального Парку почуєте в найблизшу пятницю 27. лютого/фебруара о 13.00 год. Проґрам буде повтаряный в суботу 28. лютого/фебруара о год. 7.30 та в середу 4. марця о год. 4.30.

До стрічы на (радийовым) шляку!

джерело знимкы: Якуб Зиґмунт i MOs810 (Wikimedia Commons, CC BY-SA 3.0)