Од авґуста зміны в КУЛТ МІНОР

Условія пропонованя і волеб членів до фаховых рад Фонду на підпору културы народностных меншын (КУЛТ МІНОР), котры вырішують о дотаціях, ся змінять.

Выходить то з новелы закона о Фонді на підпору културы народностных меншын, котра была прията словацькым парламентом і в середу 21-го юла 2021-го року єй підписала презідентка Словацькой републікы Зузана Чапутова. Аґентуру TASR о тім інформовав Лукаш Лацко з Одділіня комунікації презідентьской канцеларії.

В новелі закона о фонді коалічны депутаты уточнили дефініцію културной орґанізації народностной меншыны, як і евіденції културных орґанізацій, котры будуть обсяговати даны о културных орґанізаціях, котры можуть брати участь на выбераню і воліню кандідатів на членів фаховых рад.

„Подля сучасного стану на громаді орґанізацій односных народностных меншын можуть брати участь представителі орґанізацій, котры приголосять ся на вызву директора фонду і сповнюють законом становелены условія, і кедь реално не выконують жадны актівности,“ припомянули передкладателі новелы закона.

Новела має за ціль то, же свого представителя на волебну громаду односной народностной меншыны буде мати право пропоновати лем орґанізація, котра сповнює условія, і котра є записана у евіденції културных орґанізацій народностных меншын, і яка розвивать актівну діялность в области свойо діяня.

Новотов є, же меджі културны орґанізації народностных меншын подля новелы закона окрім мімовладных безпрофітовых орґанізацій доповнюють ся церькви, реліґійны общіны і юрідічны особы, котры свою юрідічну субєктівіту мають од церькви або реліґійной общіны, при котрых ся бере до увагы на їх шпеціфічне поставліня, як і орґанізачны єдиніці обчаньскых здружінь з окремов юрідічнов субєктівітов.

Новела закона о Фонді на підпору културы народностных меншын буде платна од авґуста 2021-го року. Новы вольбы фаховых рад бы так уж мали быти по новому.

Закон о Фонді на підпору културы народностных меншын, котрым выникнув фонд як верейноправна інштітуція, быв схваленый владным кабінетом Роберта Фіца у 2017-ім році. В тім році пришли першы вызвы про народностны меншыны на рік 2018. Першы штири рокы вів фонд Норберт Молнар, котрый го зачав будовати од фундаментів. В юні 2021-го року была за нову директорку выбрата Алена Котванова. Молнар по закінчіню свого функчного періоду веце не кандідовав.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА