«Од Команчы до Высовы» – найліпшым путівником

Путівник по Лемковині Низкій Бескід. Од Команчы до Высовы, авторства Вітольда Ґжесіка, Томаша Трачыка і Бартломєя Вадаса остал єдным з лавреатів в конкурсі Нагороды Маґеллана, орґанізуваного редакцийом «Літерацкого Маґазину Книжкы». Вручыня нагорід проходило першого дня Торгів Книжкы в Варшаві.

В тогорічній едициі, а была она осмом, признано 15 головных нагорід і 8 выріжнінь в 13 катеґориях (м.ін. текстовий або ілюструваний путівник, вандрівнича, ци репортажова книжка, та інчы). Серед лавреатів переважают публикациі польскых авторів. Путівник по Лемковині выграл в катеґориі текстового путівника. Другу нагороду в тій катеґориі признано путівникови авторства Кжыштофа Допєралы Тайляндия, Камбоджа, Ляос, Вєтнам. Солодко-пікантны Індохіны (выдавництво Бездрожа).

Путівник Низкій Бескід. Од Команчы до Высовы, печатаний Выдавництвом Склеп Подружніка, то найліпший путівник по Лемковині. Чыслыт аж 500 сторін, на котрых поміщено істориі вшыткых, істнуючых, або неістнуючых сел на трасі од Команчы до Высовы. Єст він другым пошыреным выданьом путівника Низкій Бескід. Од Команчы до Бортного, якій был першым (печатаний был на початку 90. років ХХ ст.) так обшырным і докладным путівником, описуючым нашы землі, котрого цілю было стрікте історичний підхід до темы. В путівнику найдете богаты історичны описы, зобгачены о інформациі з архівальных документів та реляций списаных зо споминів і бесід з людми, корінныма жытелями лемківскых сел.

Нагорода Маґеллана была основана в 2008 році, жебы выріжнити вартістны публикациі, якы стимулюют до вандруваня і выховуют новы поколіня осіб зацікавленых світом. Єй цілю єст угоноруваня найабрже вартістных туристичных публикаций. Головны нагороды трафляют до выдавців, накладом котрых печатаны были выріжнены публикациі, а лавреаты Нагорід Маґеллана отримуют статуі.