Од рана трудности при візді на Словацию

Од днес, 15. лютого/фебруара 2021 р., Словация заперла для особового і товарового руху десят граничных переходів і ввела додатковы контролі. Тыкают ся дотримуваня обовязуючых ограничынь в переміщаню ся по териториі державы, а в приграничных реґіонах є то контроля дотримуваня принципів візду зза границі.

Запертых было десят переходів, якы лучат русиньскы села з обох держав, а то: Радошыці-Полата, Ожынна-Нижня Полянка, Лелюхів-Чырч, Мушынка-Курів, і дале: Щавниця-Лесниця, Нєдзіца-Лыса над Дунайцьом, Лыса Поляна-Татряньска Яворина, Хохолів-Суха Гора, Вінярчыківка-Бобрів, Уйсолы-Новот.

Найвеце популярный перехід з Лемковины на Пряшівску Русь, Конечна-Бехерів, остає отвореный. Границю зо Словацийом мож перекрочыти, хоснуючы переходы: Пивнична-Мнішек над Попрадом, Хыжне-Трстена, Юрґів-Подспады.

Од середы, 17. лютого/фебруара, особы, якы візджают на обшыр Словациі през одкрыты переходы, будут мусіти одбывати 14-дньову кварантанну (в приватным дому або в державных осередках ізоляциі – по скорійшій реґістрациі на дедикуванім інтернетовым сайті). З обовязковой кварантанны звільнены сут м.ін. професийны водителі товарового, особового транспортів, службы здоровля ци обслуга желізниці. Днес і заран, візджаючы на обшыр Словациі, треба мати при собі неґативный результат тесту RT-PCR на COVID-19, од середы – обовязкова буде спомнена кварантанна.

Громадяне держав Евросоюзу можут переізджати транзитом через обшыр Словациі до інчой державы ЕС лем 8 годин без затримуваня ся, за вынятком необхідного танкуваня на паливовых стациях. В примірі транзиту не треба мати неґативный тест на COVID-19.

Ограничыня мают потырвати найменше до кінця лютого/фебруара. Зас до 19. марця обовязує введеный словацкыма властями надзвычайный стан на обшыри цілой державы.

За: www.gov.pl