Олена Дуць-Файфер одкликана

Днес (1. вересня 2014 р.) дознали сме ся, же премєр ПР Дональд Туск одкликал з функциі репрезентанта лемківской меншыны в Спільній Комісиі Уряду та Нацийональных і Етнічных Меншын (СКУтНіЕМ) др габ. Олену Дуць-Файфер.

Хоц была барз цінена в працах Спільной Комісиі, як експерт в меншыновых (не лем лемківскых) справах, таємна до днес коаліция орґанізаций, з якых деякы ачий заперечают істнуваню Лемків (!), довершыла свій плян, якого цілю было одкликаня дотеперішньой репрезентанткы (писали сме о тым на нашым портали – чытайте за мотузком).

Процедура одкликуваня і покликуваня членів СКУтНіЕМ з меншыновой стороны до днес остає барз неясна і арбітральна, а, як вказує тот примір, може зміняти ся враз з актуальном – тіж неясном – ситуацийом в меншыновій обшыри (бо напр. чом антилемківскы орґанізациі мали бы не рішати о Лемках!).

Незалежні од того, в місце др габ. Олены Дуць-Файфер, рішыньом премєра ПР, покликана остала др Мирослава Копыстяньска, якой кандидатура была дана орґанізациям до опініюваня іщы в червци того рока (до прочытаня за мотузком).

Спільна Комісия Уряду та Нацийональных і Етнічных Меншын была основана в 2005 р. (перше засіданя – 21 ІХ 2005 р). Єй першыма репрезентантами з лемківской етнічной меншыны были др габ. Олена Дуць-Файфер і Штефан Гладик. По влонишній бурі і завязаню выже спомненой таємной коаліциі, репрезентанты остали одкликаны. 1. червця 2014 р., в місце Штефана Гладика, премєр ПР Дональд Туск покликал др габ. Штефана Дудру, професора Зеленогірского Університету, а в місце др габ. Олены Дуць-Файфер, од днес, покликана єст др Мирослава Копыстяньска.