Онлайн о економічнім статусі і положіню народностных меншын реґіону

28-го януара 2021-го року проходила онлайн стріча новосадьского Центра про реґіоналізм і Фундації Ганнса Зайдела, в рамках котрой участны бісідовали на тему економічного статусу і положіня меншын в реґіоні. Інформовала о тім аґентура Рутенпрес.

На стрічі ся конштатовало, же леґіслатівны рамкы, в котрых ся творять права меншын реґіону, суть штандартны. Публічно ся за інформаціями аґентуры все частіше бісідує о другім сеґменті творіня меншыновых прав, о такзванім нештандартнім меншыновім праві, котрый є повязаный з економічным статусом меншын на тій теріторії.

Баданя потверджують, же членове народностных меншын реґіону жыють в руралных і нерозвитых областях. Їх економічна сила є найслабша в порівнаню з рештов населіня. Наслідками такой сітуації суть велика уровень міґрації, асімілація ці слаба можность поступу в сполоченьскій єрархії моци і впливу.

Міґрація псує образ о мултікултурній Сербії

На онлайн стрічі брали участь бадателі, представителі націоналных совітів і експерты в даній области.

Олена Папуґа, державный секретарь Міністерства про людьскы права, права меншын і соціалный діалоґ, а єдночасно і членка Націоналного совіту Русинів у Сербії в рамках свого выступу повіла, же в найблизшім часі навщівить вшыткы націоналны совіты і обговорить з представителями меншын в Сербії вшыткы проблемы, з котрыма ся стрічають.

Підкреслила, же велика міґрація псує образ о Сербії як мултікултурній країні. В тім припаді векшу задачу і веце актівностей будуть мати за їй словами націонланы совіты. Веце актівностей міністерства і націоналных совітів буде напряменых на захованя материньского языка через сістему освіты.

Центер про реґіоналізм

Центер про реґіоналізм быв основаный в октобрі 1998-го року ґрупов інтелектуалів з Нового Саду з цільом афірмації і пропаґації ідеї реґіоналізму в згоді із сучасныма европскыма трендами і скушеностями. Просаджує і фахово пояснює потребу демократізації і децентралізації Сербії, як і підпору співпраці в тім реґіоні.

Од свого основаня Центер про реґіоналізм реалізовав велике множество фаховых проєктів заміряных на нормалізацію односин і зміріня меджі країнами бывшой Югославії, як і на теріторії Косова по конфлікті з 1999-го року.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА