Осіння «Бесіда» – явила ся уж в нашых хыжах

В посліднім часі явил ся пятый тогорічный номер часопису Стоваришыня Лемків – «Бесіда», ч. 5 (206) за місяці вересен/жолтен 2025 р.

В номері прочытаме м.ін. статі:

• Наталия Малецка-Новак, Лемківскій в центрі увагы Европы – Mercator публикує нове опрацуваня;
• Севериян Косовскій, Ювілей лемківского творці і філософа – проф. Павла Коробчака;
• Севериян Косовскій, Гора Явір – місце близкє вшыткым Лемкам;
• Севериян Косовскій, 100 років од обявлінь Богородиці на Яворі припомнули і грекокатоликы;
• Мирослав Воргач, По лемківскы в ґміні Радваниці, стріча з історийом і культуром Лемків;
• Наталия Малецка-Новак, Лемківскы орґанізациі внескуют о одкликаня Григория Куприяновича; 
• Севериян Косовскій, Грабан, Басалыґа, Лабик – Тогорічны лавреаты Нагороды ім. Никыфора; «Ластівочка» одсвяткувала 25-літя;
• РомДЗ (так підписаный автор), ХХХІ Стрічы з Лемківском Культуром;
• Петро Трохановскій, Димитрий Бортняньскій (1751-1825);
• Петро Трохановскій, Творці Підкарпатского Піємонту;
• Петро Медвідь, Вмер Володимір Микыта, продолжуватель русиньской Підкарпатской Малярской Школы. 

Окрем выже спомненых дописів, найдете і інчы цікавы справы. На вступі привитат вас образом істория – одповід на пошырюваня пілправды і неправды. Што то такє? Дознате ся, як придбате номер.

Як все є постійна част «Новины, не новины – не лем з Лемковины» інформуюча о найважнійшых подіях з русиньского світа, што одбыли ся за вакацийный період.

Не бракує і Амрозового казаня. Його погляд на сучасніст найдете на остатній страні.

Двомісячник «Бесіда» то часопис Головного Заряду Стоваришыня Лемків, выходит од 1989 рока, присвяченый єст збережыню істориі, культуры і языка Лемків, інформуючый о жытю нашой і братніх нам соспільности, плекаючый вірні надіі прадідів і вітців.

«Бесіду» мож почытати в бібліотеці Руской Бурсы в Ґорлицях. Ґазета є тіж доступна в локальных Кружках Стоваришыня Лемків в Польщы.

Найновшый номер, як тіж архівальны номеры часопису «Бесіда» годны сте придбати в електронічній версиі контактуючы ся з выдавцьом на сайті www.stowarzyszenielemkow.pl.