Озвены Вовчіх гор капчають традіцію, природу і радость про цілу родину

Пририхтуйте ся на незабытный вікенд повный музикы, смаків і фареб природы. Фестівал Озвены Вовчіх гор, котрый одбуде ся в днях 18-го аж 19-го юла 2025-го року у селі Влыч, знова ожывить сердце Народного парку Полонины, і позывать людей із цілой Словакії, а нелем, спробовати унікатну атмосферу найвыходнішого куточка Словацькой републікы.

Тот вынятковый фестівал, найстаршый в Сниньскім реґіоні, котрый одбуде ся під звіздным небом Парку темного неба і в обнятю карпатьскых лісів, є святом русиньской културы, традічного ремесла і жывота в гармонії з природов.

В оточіню, де стрічать ся покій природы із пулзуючім духом комуніты, собі каждый прийде на тото своє.

То нелем о музиці, але і навернутю ку коріням

Озвены Вовчіх гор не суть лем фестівалом, але і навернутьом ку коріням. Богатый проґрам принесе выступліня фолклорных ансамблів, співацькых ґруп, солістів, як і концерты сучасных музикантів, котры іншпірованы суть народныма мотівами.

На сцені представлять ся і дітячі колектівы, чім фестівал потверджує, же култура ту жыє через ґенерації.

Сердцьом фестівалу суть містны ремеселници, подникателі, котры принесуть тото найліпше із свойой роботы. Навщівници можуть тішыти ся на ярмарок повный традічных ремесел, якы собі можуть на місці і спробовати.

Діти можуть тішыти ся на творчі вытварны, танечны і музичны ці ремеселны варштаты, гры в природі, забавны атракції, і контакт із звірятками, покля дорослы підуть на беседы, выставы, і якостный културный проґрам.

Вынятковы Полонины

Фестівал орґанізує ся в унікатнім оточіню Народного парку Полонины, котрый знамый є найтемнішым небом на Словакії, стародавныма буковыма пралісами, і вынятковов біодіверзітов. Навщівници можуть скапчати културный зажыток із турістіков, ціклотурістіков ці прогульками по пралісах, ку деревяным храмам, котры суть записаны на Списку світовой дідовизны UNESCO.

Озвены Вовчіх гор – то нелем фестівал. То місце, де стрічать ся минулость із сучасностьов, чоловік із природов, а комуніта із навщівниками. Не запізнийте шансу быти частьов той події, котра лишыть сліды у вашім сердці. Про веце інформацій можете навщівити вебсайт фестівалу Озвены Вовчіх гор.

Автор: Домініка Новотна