Памят про Токаік

В тых днях споминаме траґедию, котра прошла в русиньскым селі Токаік, недалеко Стропкова. 19. листопада 1944 рока, в реванж за поміч совітскым партизанам з групы Чапаєв, гітлеровскы солдати з Einsatzgruppe H – Kommando ZbV 27.  при токаіцкій церкви арештували вшыткых 34 хлопів зо села і выпровадили іх гейбы до роботы. Кільометер за селом вшыткых постріляли. Лем двох раненых пережыло тоту масакру, были то Андрий Стропківскій і Михал Медвідь, котрий пережыл вкрытий тілом свого розстріляного брата.

Другого дня Німці зас пришли до села, розкрали вшытко, што ся лем дало, спустошыли го, а на конец спалили. З цілого села остала лем неспалена церков і єдна хыжа. Жены, старців і малы діти Німці прогнали гет.

28. листопада 1944 рока Токаік і сусідні села были освободжены през солдатів 4. украіньского фронта.

В 1959 році в місци масакры токаічанів был одкрытий памятник з каменя, котрого автором є різбяр русиньского походжыня Франьо Ґібала.