Праздник в ґладышівскій парохіі

Грекокатолицка громада в Ґладышові одсвяткувала свій парохіяльный праздник. Як раз было тото 29. мая, в свято Вознесіня Господнього, під яком покровом находит ся ґладышівска церков. Інформувал о тым вебсайт перемышльско-варшавской архієпархіі.

На тогорічный праздник до Ґладышова пришол владыка Євген, архієпископ і митрополита перемышлько-варшавской арієпархіі грекокатолицкой Цервки в Польщы. Окрем предстоятеля єпархіі і місцевого пароха о. Ярослава Чухты, в богослужынях взяли участ і дальшы священникы краківско-ґорлицкого деканату, а тіж місцевый римокатолицкій священник.

Владыку витал парафіянин Петро Вірхняньскій. Вчас Божеской Літургіі проповід тримал архієпископ Євген. Владыка звернул увагу на чловечу необхідніст прагніня неба для каждого християнина.

Вчас тогорічного праздника владыка поздоровил пароха – о. Ярослава Чухту з 15. річницьом священьста, якого нагородил правом ношыня золотого креста з прикрасами. При нагоді ґладышівского свята владыка передал тіж грамоту для отця протодіакона Владислава Качмара.

По богослужыню митрополита Євген дякувал парохіянам за вірніст Церкви та духовеньству за спільну молитву.

Грекокатолицкій храм Вознесіня Господнього в Ґладышові был побудуваный в роках 1938-1939. Церков поставили гуцульскы теслі, прото презентує она рідко стрічаный на Лемковині стиль сакрального будівництва, а выконана поліхромія вписує ся в архітектонічну форму будівлі.

Хоц святыня чыслит більше як девятдесят років, за остатні рокы была прикрашана для потреб східньой літургіі. В 2006 р. был вставленый і посвяченый іконостах, а 6. листопада/новембра 2022 р. владыка Євген посвятил нову фіґурально-орнаментальну поліхромію. Храм наштоден служыт тіж римокатоликам.

фот. www.cerkiew.org