Персональны зміны во вроцлавско-щеціньскій єпархіі ПАПЦ. Новы настоятелі деякых лемківскых парохій

Заявом з 28. січня/януара 2019 р., яка публикувана была на офіцияльным сайті вроцлавско-щеціньской єпархіі Польской Автокефальной Православной Церкви, архієпископ Юрий змінил настоятелів декотрых парохій, входячых в склад той західньой єпархіі в Польщы. Серед парохій, на котрых од пару дни будут новы священникы, сут і такы, якы цілковито або в більшости творят Русины.

Єден з декретів тыкат парохій Успіня Пресвятой Богородиці Зимній Воді і св. Михала в Михалові. Дотепершіній настоятель, о. Юрий Маліш, з дньом 10. лютого/фебруара перестане быти парохом реченых громад. Священник од слідуючого дня обыйме парохію св. Михала в Липинах та церков Вшыткых Святых в Кожухові. Дотеперішній настоятель Липин і Кожухова, о. митр. др Дарий Цьолка перейде служыти до  парохій Воздвижыня Честного Креста Господнього в Рудній та св. Максима Ґорлицкого в Ґлоґові. О. митр. Славомир Кондратюк, якій служыл дотепер в Рудній і Ґлоґові, од 11. лютого/фебруара зачне свою пастырску послугу серед вірных в Зимній Воді і Михалові. Так само до Зимной Воды перенесена буде сідиба любіньского деканату.

Фактично, єпархіяльна канцелярия подала до відомости аж дванадцет архієрейскых декретів тыкаючых персольных змін і єден про нагороду. Спомнены парохіі в Зимній Воді, Михалові, Ґлоґові, Рудній, Кожухові і Липинах творят в більшости потомны переселеных в 1947 р. вірных з Лемковины. Парохію в Зимній Воді завязували переселенці з Бортного, а михалівску церков, як першу і такой єдину церкву в західньо-лемківскым стилю на західніх землях Польщы, побудували фльоринчане. Вірныма в Рудній сут предовшыткым потомны выселенців з Фльоринкы, Устя Руского, Ганчовы і Верховні. До храмів в Липинах і Кожухові приналежат потомны фльоринчан, а тіж переселенців зо сел Квятон і Смерековец.

Шторік в Михалові вчас тырваня Лемківской Ватры на Чужыні правлены сут в місцевій церкви богослужыня про ватрянів.

Полну інформацию владыкы Юрия, архієпископа вроцлавско-щеціньской єпархіі, Православного Ординария Польского Войска, чытайте за мотузком.