Петро Мурянка і Моніка Ліс нагороджены – признано нагороды «Арс Кверенді»

В минулий віторок, 25. жолтня/октобра, были вручены нагороды Малопольского Воєвідства в 9. едициі конкурсу Арс Кверенді за вызначне діяня для промоциі і розвитку культуры. То нагорода, котра признавана єст як получыня трьох катеґорицй: Мастер-Унечик-Проєкт, де мастер типує свого ученика, пак разом представляют до нагороды даякій творчый проєкт, котрий оцінюваний єст через жырі, зложене з представників світа культуры і наукы, соспільных орґанізаций та члена заряду Малопольского Воєвідства.

В текучій едициі достережены і нагороджены остали, м.ін. Петро Трохановскій (Петро Мурянка) – найвыдатнійший сучасний лемківскій писменник і поета, творця і композитор та Моніка Ліс – докторантка філософіі на Ягайлоньскым Університеті в Кракові. Нагороджений был тіж іх поетично-музычний проєкт «Танці душы». Лавреаты одобрали нагороды вчас торжественной ґали, яка проходила в просторах Малопольской Загороды Штукы в Кракові. Вручыл іх Лешек Зеґзда з заряду воєвідства і проф. Фратнішек Зяйка, ведучий жырі нагороды.

Нагорода Арс Кверенді дозвалят на доцініня тых представників світа культуры, штукы і наукы, котры понад поколіньовыма ріжницями мают охоту поділити ся своім досвідчыньом з молодыма наступцями, якы прібуют своіх сил, ідучы слідами мастерів.

Пути Петра Мурянкы – як мастера – і Монікы Ліс – як учениці – зышли ся в 2014 році вчас рыхтуваня лемківскым ансамбльом Клюб деМоль нового проєкту пн. «Вершы верхам», будучого авторскым ділом менаджера ґрупы, Миахла Кайды. Петро Мурянка в проєкті творил лемківскы тексты пісен подля драфтів Михала, автора польскоязычных вершів, а Моніка доложыла ґу тому стишок «Бесіда», єй перший верш в лемківскым языку, в котрым представлят своі філософічны роздумы, бесідує з Богом. Проєкт «Танці душы» описує дорогу Монікы Ліс до дознаня ся о своім лемкіскым походжыню. Єст він продолжыньом попереднього проєкту, наставленого на промоцию лемківской культуры для польского культурового кругу.

Лавреаты Нагороды Малопольского Воєвідства Арс Кверенді за вызначны діяня для промоциі і розвитку культуры отримали: Мастер – 6.000 зл, Ученик – 4.000 зл. Сам проєкт буде спертий квотом 25.000 зл. Нагорода признавана єст од 2008 рока. Серед дотеперішніх мастерів находят ся м.ін. проф. Єжы Треля, Кжыштоф Ґльобіш ци проф. Кристиян Люпа.