Піддукляньскый освітній центер має новы модерны просторы. Дома там будуть Маковіця і Маковічка

Ставебны роботы в Піддукляньскім освітнім центрі у Свіднику завершыли ся. Як інформовала Леа Геілова з Одділіня комунікації і пропаґації Канцеларії председы Пряшівского самосправного краю (ПСК), реконштрукція і прибудована часть стояли 834 тісяч евр.

Роботы в Піддукляньскім освітнім центрі тырвали 2,5 рока. Зробив ся простор про фолклорны ансамблі, але і про выставкы ці творчі варштаты.

Нова танечна сала і кройовня

„До прибудованой новой безбарьєровой части будовы і часточной реконштрукції історічной будовы Піддукляньского освітнього центру у Свіднику сьме проінвестовали понад 834 тісяч евр. Тішыть ня, же сьме тым могли вытворити културный центер про таленты в двох реґіонах, окресу Свідник і Стропків, котры освітній центер покрывать. Фолклорный колектів Маковіця і Дітячій фолклорный колектів Маковічка уж не будуть мусити мати пробы в арендованых просторах, але в цалком новій танечній салі під зряджовательом – крайсков самосправов,“ конштатовав председа Пряшівского самосправного краю Мілан Маєрьскый.

В новій будові зробила ся танечна сала, шатні, кройовня, так само там суть і соціалны заряджіня, розложытельна трібуна ці вытяг. Окрім того была зреконштруована історічна будова, котра є з новов перепоєна.

Піддукляньскый освітній центер у Свіднику свойов діялностьов покрывать села і міста двох окресів – Свідника і Стропкова, в котрых жыє коло 63 тісяч жытелів. Центер є і творцьом а співтворцьом културных і освітніх актівностей. Приготовлює і реалізує головно фестівалы, конкурзы, переглядкы, выставкы, творчі варштаты і далшы презентачны і освітні події.

Маковіця і Маковіча

Ансамбель Маковіця належыть меджі найстаршы народностны колектівы на Словакії. Од свого выникнутя у 1956-ім році аж дотеперь репрезентує културу Русинів. Його зряджовательом є Піддукляньскый освітній центер у Свіднику.

Ансамбель выступав на многых домашній подіях і фестівалах, но перешов і практічно цілу Европу а часть Азії. Успіхы почас свого існованя здобыв і на многых конкурзных переглядках. В році 2011 му была уділена Ціна председы Пряшівского самосправного краю за выняткову презентацію народностной културы і вынятковы успіхы досягнены пошырьованьом културной дідовизны предків.

Дітячій ансамбель Маковічка выникнув у 1997-ім році, жебы приготовльовати діти про Маковіцю. Суть в нім діти од 7 до 14 років і так само належыть під освітній центер.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА