«По лекциях єм дзвoнарьом». Бесіда з Натанєльом Завликом з Корчыны – середа, год. 20.10

Натанєль Завлик має 15 років, мешкат в Корчыні к. Біча. Дзвонами зачал ся інтересувати уж од малой дітины. Знає ся на них уж чысто незлі – послухайте бесіды з молодым дзвонарьом в середу 16. липця/юлия о год. 20.10.

«На Лемковині, і не лем, мож стрітити барз цікавы дзвоны, (…) по ІІ світовій войні дзвоны были переношены з Нижнього Шлеска, напримір в Зындрановій в православній церкви находит ся дзвін перенесеный з Любіна» – оповідат Натанєль.

Першы інформациі о дзвонах брал з каналів на YouTube од інчых, тепер уж такых як він – фасцинатів дзвонів. Чытат о них доступну літературу, пресу, робит своі досліджыня.

Предовшыткым інвентаризує дзвоны з реґіону – описує, слухат, нагрыват. В будучности хотіл бы зінвентаризувати вшыткы доступны на Лемковині дзвоны і зробити з того наукову публикацию.

Реґулярні ходит до церкви. Піл рока ощаджал на свою приватну дзвінницю з дзвоном, котру повело ся поставити. Родиче міцно підперают в нештоденным заінтересуваню парунадцетлінього сына.

Премєра проґраму в середу 16. липця/юлия 2025 р. о год. 20.10, повторіня в суботу 19. липця/юлия о год. 9.30 та в понедільок 21. липця/юлия о год. 9.30 і 20.10.