Подля Андрія Балогы ся вшыткы Закарпатці ідентіфікують як Українці

У віторок, 26-го януара 2016 р., приніс україньскый портал Главком розговор із новым мером Мукачова Андрійом Балогом. Микола Підвезяный, котрый інтервю з Балогом робив, опросив ся і на тему русиньского ці мадярьского сепаратізма на Підкарпатю.

Редактор позвідав ся, ці є реална грозьба „мадяро-русиньского“ сепаратізма, або є том лем ефемерна грозьба. Андрій Балога одповідать, же таке дашто абсолутно не існує. Додавать, же на Підкарпатю были і Америчаны, котры пришли із цільом досліджати можливость такой грозьбы. Два тыждні спознавали сітуацію, кідьже їм в Києві о такім говорили. Резултаты їх досліджінь, як продовжує Балога, вказали, же лем 1,5 процента містных жытелів видить Підкарпатя мімо Україны, решта в складі Україны. Балога потім і далше в розговорі бісідує, же сепаратізм є міф, котрый ся пошырює.

Новый мер Мукачова в тій самій одповіді односно сепаратізма говорить, же „вшыткы Закарпатці ся ідентіфікують як Українці.“ Штатістікы говорять інше. Подля остатнього, і затля єдиного перепису, населіня на Україні, котре проходило о 2001-ім році, в Закарпатьскій области Україны жыє веце як 100 народностей. Подля штатістік бы в тій области мало жыти 80,5 процента Українців, 12,1 процента Мадярів, 2,6 процента Румунів, 2,5 процента Росіянів, 1,1 процента Ромів, 0,5 процента Словаків, 0,3 процента Німців, і меншы кількости Білоросіянів, Жыдів, Поляків і далшых. Русины были зарахованы до Українців і не могли ся голосити ку своїй народности.

Андрій Балога є сыном Віктора Балогы. На функцію мера быв выбраный в октобрі минулого рока, коли проходили локалны выборы на Україні. Здобыв 62,7 процент. Кандідовав за партію Єдиный центер, котру засновав його отець Віктор Балога.

Фотоґрафія: pmg.ua

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА