Політика міністерства взглядом нацийональных меншын – соймова комісия выслухала інформациі од шефа МВСіА

Соймова Комісия Нацийональных і Етнічных Меншын выслухала в віторок, 21. січня/януара, інформациі шефа Міністерства Внутрішніх Справ і Адміністрациі про пріоритеты політикы взглядом нацийональных і етнічных меншын на рокы 2020-2024, котры представил віцеміністер внутрішніх справ і адміністрациі Блажей Побожый.

Як передал комісиі віцеміністер Побожый, його ресорт на рокы 2020-2024 заплянувал діяня, котры складают ся на пят пріоритетів.

Першом справом «має быти забезпечыня справной, ретельной і терміновой обслугы внесків о дотациі на реалізацию задач, котрых цілю є охорона, захованя і розвиток культуровой достоменности нацийональных і етнічных меншын та захованя і розвиток реґіонального языка».

Другом задачом є електорнічный набір внесків о признаня дотаций. В оціні Побожого таку систему вартат зробити, а в буджеті міністерства сут забезпечены на тото грошы.

Третя задача то зрыхтуваня і опрацуваня заложынь дальшой едициі проґраму для ромской соспільности. Побожый поінформувал, што 2020 рік є посліднім, в котрым реалізуваный є «Проґрам інтеґрациі ромской соспільности в Польщы на рокы 2014-2020», зато МВСіА хоче опрацувати і буде стремило до принятя через уряд нового проґраму для той соспільности. «Хотіл бы-м, жебы особливый натиск зас был положеный на едукацию. Там видиме джерело вшыткых інчых браків» – бесідувал.

Забезпечыня справной обслугы засідань Спільной Комісиі Уряду та Нацийональных і Етнічных Меншын то четвертый выміненый віцеміністром пріоритет. «То є головне місце, де є діалоґ з репрезентацийом нацийональных, етнічных меншын ци соспільности хоснуючых реґіональный язык» – підкрислил Побожый.

Пятым елементом є медженародна спілпраца. «Ситуация нацийональных і етнічных меншын є предметом заінтересуваня вельох медженародных інституций, Европейской Комісиі, Рады Европы, ОЗН. Є тіж предметом вельох білятеральных договорів» – припомнул Побожый.

В часі дискусиі по выступліню віцеміністра посол Конфедерациі Ґжеґож Браун звідал, кілько коштуют тоты діяня МВСіА. Побожый поінформувал, што «кєд іде о предметовы і цільовы дотациі, є то 16,5 млн зл, а ромскій проґрам то кошт 10 млн зл».