Полномічник малопольского воєводы стрітил ся з меншынами

В четвер 13. червця/юнія 2024 р. прошла стріча полномічника малопольского воєводы до справ нацийональных і етнічных меншын Томаша Оцеткєвича з представниками меншыновых орґанізаций і соспільности. Має быти ліпше.

Полномічник малопольского воєводы до справ нацийональных і етнічных меншын Томаш Оцеткєвич принял представників меншын в сідибі Воєвідского Уряду в Кракові. Была то перша така стріча з меншынами в тым році, понеже попередня прошла 13. грудня/децембра 2023 рока.

Присутны были представникы ріжных меншыновых позаурядовых орґанізаций, што зареґіструваны сут в Малопольщы. Была репрезентация м.ін. жыдівской, украіньской, ормяньской, лемківской ци, в найвекшым чыслі – ромской соспільности. В стрічы участ взяла тіж Мирослава Копыстяньска, яка засідат в Спільній Комісиі Уряду та Нацийональных і Етнічных Меншын за меншынову страну.

Полномічник в першій черзі зреферувал зміны, якы проходят на леніі Міністерство Внутрішніх Справ і Адміністрациі (міністерство властиве до справ нацийональных і етнічных меншын) а уряды воєводів. Міністер Томаш Шыманьскій хоче справнійшой і ефективнійшой комунікациі медже тыма орґанами і векшого заанґажуваня воєводів і полномічників в справы меншын. Поправити має ся предовшыткым передаваня інформаций, што тыкают ситуациі і болячок меншын та реаґуваня на них.

Влада хоче быти присутна в жытю меншын

Полномічник Томаш Оцеткєвич заповіл, же нова влада хоче быти веце присутна на подіях і ініциятивах орґанізуваных меншынами. В звязку з тым выстосувал апель до меншыновых орґанізаций, жебы одповідньо скорше (найменше два, три тыжні наперед) присылали запрошыня так до міністерства, як і до воєвідского уряду.

Полномічник заповіл, што для фінансового одтяжыня меншын доступны до орґанізуваня выстав, конференций і інчых того рода ініциятив будут будинкы воєвідского уряду в Кракові, Тарнові і Новым Санчы.

В навязаню до барже технічых справ тыкаючых фінансуваня активности меншын, полномічник припомнул, што Міністерство Внутрішніх Справ і Адміністрациі робит над змінами в реґуляміні, што тыкают складаня оферт на підпертя діяльности звязаной з охороном, продолжаньом і розвиваньом культуровой достоменности меншын та што стремит до того, жебы єдином формом аплікуваня і справоздаваня был Електронный Систем Уділюваня Дотаций пропонуваный МВСіА. Помимо введіня пілотажовой версиі систему в 2021 році, систем фурт не єст допрацуваный, не сполнят европейскых норм безпекы і не єст приязный хоснувателям, на што звертали увагу представникы меншыновых орґанізаций.

Зміны в СКУтНіЕМ, новы лідеры

В дальшій части стрічы прошли свобідны выповіди присутных – представникы меншын заберали голос в вельох ріжных обшырях. Найвеце голосів появило ся од членів ромской соспільности, якы зосереджали ся головні на дискримінацийных захованях взглядом іхньой соспільности.

Полномічник Томаш Оцеткєвич звернул увагу, же загалом звекшат ся чысло дискримінацийных інцидентів взглядом не лем ромской, але і лемківской ци жыдівской меншын. Заапелювал о передаваня вшыткых справ не лем на поліцию, але і безпосередньо до його уряду.

Зо страны представників парох меншын і орґанізаций представленый был проблем змін в складі Спільной Комісиі Уряду на Нацийональных і Етнічных Меншын. Меншыны звртали увагу, же хоц зголошуют потребу змін, то іх голос не єст браный бо увагы.

Полномічник заапелювал іщы, жебы меншыны звекшыли діяня в обшыри анґажуваня молодых членів своіх соспільности. Повіл, што лем насилены намагы меншын при формуваню новых лідерів поможут перетырвати соспільностям.

Фот. www.malopolska.uw.gov.pl