Полонины бы могли стати кліматічныма купелями. ПСК на тім працує

Унікатны Полонины бы знова могли стати кліматічныма купелями, як то было в минулости. Пряшівскый самосправный край (ПСК) як єдиный на Словакії зробив сістематічну стратеґію, як то досягнути, і став так само партнером в проєкті GreenHealth, котрый посередництвом іноватівных приступів мінить хранену теріторію на місце про здоровый жывот.

Як за ПСК інформовала Даша Єленьова, і о тім была недавна конференція в Снині, почас котрой ключовы партнеры із Полонин підписали меморандум, якый одкрывать путь ку шыріню моделів лісной терапії а природного турізму і до далшых реґіонів Пряшівского краю.

Партнеры підписали меморандум

Фаховці із Словакії, Польщі і Іспанії, представителі Народного парку Полонины, Словацькой асоціації лісного купеля і лісной терапії, як і різны актеры із теріторії, включно представителів Пряшівского самосправного краю, 17-го фебруара 2026-го року стрітили ся в історічнім каштелі в Снині, жебы представити іноватівны приступы ку хоснованю природы про здоровля і комфорт жытелів.

Конференція під назвов Природа і здоровля, яка была реалізована в рамках проєкту GreenHealth, принесла так само підпис Меморандума о співпраці ключовых актерів із теріторії Полонин. Сіґнатарі підписом меморандума потвердили, же в Полонинах хотять творити моделовы продукты а проґрамы здравотного і природного турізму.

„Полонины суть місцьом, де богата природа, біодіверзіта і жывот містных комуніт ідуть бік по боці, і мы їх видиме як простор нелем про рушаня, але і як часть превенції і душевного комфорту. Уж дакілько років співпрацуєме із Народным парком Полонины в рамках веце ініціатів, і якраз тоты скушености нам вказали, же природа може быти інштрументом превенції хворот, підпоры душевного здоровля і підниманя якости жывота обывателів,“ повів у Снині председа ПСК Мілан Маєрьскый.

„Підписом меморандума даєме ясный сіґнал, же хочеме тоты скушености сістематічно хосновати і розвивати. Я пересвідченый, же вєдно докажеме принести реалны резултаты, створити унікатны продукты здравотного і природного турізму, котры будуть служыти людям і природі, і такым способом передыйти стресу, выгоріню і цівілізачным хворотам, котры безпохыбно дотуляють ся каждого із нас,“ повів далше жупан Маєрьскый.

На актівности проєкту контінулано надвязав Меморандум о взаємній співпраці, котрый ПСК підписав із Словацьков асоціаційов лісного купеля і лісной терапії а Справов Народного парку Полонины. Партнеры тым декларовали охоту підтримовати здравотный і природный турізм, як і комунітны актівности, моделовы продукты, і фахову освіту ці діліня ся о know-how.

Жыєме одрізаны од прапервістного оточіня

„В рамках теріторії Пряшівского краю маєме множество вынятково файных локаліт, якыма суть Полонины ці Высокы Татры. І векшына нашых купелів, але і шпыталів, має у своїй околіці красны паркы, де ся може давати паціентам і кліентам лісный купель ці лісна терапія,“ повіла шефка Словацькой асоціації лісного купеля і лісной терапії Берта Сташкова.

„Жыєме в добі, коли сьме дословно одрізаны од нашого прапервістного оточіня, і од природы, зато суть тоты актівности, котры суть добры справды про каждого, так важны. Суть цілены головно на дорослых, але робиме і з дітми,“ додала Сташкова з тым, же при дітях актівности лісной педаґоґікы мішають із актівностями лісного купеля, медітаціями ці іншыма техніками, котры значно знижують тяжобу хронічных хворот і зліпшують якость жывота.

Головным цільом меморандума є якраз сістематічна імплементація прикладів доброй практікы із проєкту GreenHealth, і їх шыріня до цілого Пряшівского краю. Іде о конкретный крок, як іщі вызначнішым способом скапчати охрану природы і здоровля людей в реґіонах, і сістематічно розвивати природно орьєнтованы превентівны релаксачны проґрамы, котрыма суть лісный купель або лісны терапії. Єдночасно то звекшує атрактівность реґіону і підтирмує його утримательный турізм.

„Лісный купель докаже в малых ґрупах навязати на себе множество людей, котры будуть ходити на народного парку, і такым способом звекшыть ся його навщівность. Єдночасно ся тым поможе містным комунітам, котры ту будуть старати ся о уквартельованя, ґастрослужбы, стравованя і містны продукты, якы теперь на тій теріторії бракують,“ повів директор Справы Народного парку Полонины Йосиф Воляньскый.

ПСК як піонір

Пряшівскый самосправный край при розвитку перепоїня природы, здоровля і превенції выпрофіловав ся як піонір на уровни самосправных країв.

В рамках меджінародного проєкту GreenHealth, котрым надвязує на актівности реалізованы в Народнім парку Полонины в рамках ініціатівы Catching up-Regions, творить в Полонинах дословно „жывы лабораторії“, і в тых ініціює діскусії о тім, як можуть хранены теріторії і природны оточіня служыти як ключовы інштрументы про здоровый штіл жывота і реґіоналный розвиток.

Проєкт GreenHealth, котрый капчать реґіоны із Словакії, Польщі, Іспанії, Ірландії, Хорватії, Швеції і Німецька, є фінанцованый із Проґраму Interreg Europe 2021 – 2027, і його розрахунок про ПСК є на уровни 188 тісяч евр.