Поляны Суровичны з крестом як колиси

В рамках ратуваня прицерковной дзвінниці в неістнуючым лемківскым селі Поляны Суровичны (східня Лемковина) ведены сут дальшы роботы. Як заявляют орґанізаторы проєкту, до Полян вернул крест з загыбшой грекокатолицкой церкви св. Михала Архангела, яка стояла при муруваній дзвінниці.

Знищений крест піддано реновациі і по завершыню ремонту дзвінниці буде вінчал баню будівлі. Фонды на ревіталізацию креста были в більшости переказаны через родины бывшых жытелів Полян Суровичных, якы тепер прожывают в Украіні.

Як інформуют орґанізаторы заходів в комунікаті з кінця марця т.р., до яри 2017 р. ремонтовы роботы были стриманы з формальных причын. Послідній етап ремонту – одбудова даху – вымагат леґального проєкту та дальшых дозволінь. Єдном з причын продолжаня ся тых формальных прац были адміністрацийны зміны повязаны зо змінамы границ ґміны і повіту. Од 1. січня/януара т.р. село Поляны Суровичны находит ся в ґміні Яслиска, коросняньского повіту. Дальше в комунікаті чытаме, што орґанізаторы змушены сут, з выже спомненых причын, переложыти конструкцийны роботы на будучий рік (перше заявляли сме, што проєкт прикрытя даху дзвінниці баньом мал быти доцільово ведений протягом т.р.). Тот рік пройде на актуальным втриманю будівлі та порядкуваню обшыри вколо дзвінниці.

Новий дах з баньом – по шырокых консультациях і збераню опіній – має брати за взір бані над притвором і середньом частю церкви в Вислоку Нижнім (східня Лемковина). Фінальний проєкт вежы-дзвінниці в Полянах Суровичных зрыхтувано, інспіруючы ся як раз тым сусіднім обєктом. Дальше мож фінансово сперати одбудову дзвінниці з загыбшого лемківского села Поляны Суровичны, вплачаючы грошы на банковий рахунок Стоваришыня Грекокатолицкой Молодежы «Сарепта».

76 1500 1559 1215 5003 7213 0000
Stowarzyszenie SAREPTA, ul. Zdrojowa 8, 33-380 Krynica Zdrój
Конечні з дописком: Remont dzwonnicy w Polanach Surowicznych. 

фот. Фб