Посвячыня памятника в Ріпках – фотореляция (фот. Ольга Шевчык)

В суботу, 5. листопада/новембра т.р., од 14.00 год. в Ріпках проходило торжество. Торжество, котре мало припомянути про траґічну історию 40. років ХХ ст., котра дітхнула не лем Лемків, але і іх одвічных сусідів – Жыдів та Ромів.

Перед 70. річницьом выгнаня Лемків на західні землі Польщы в рамках беззаконной Акциі «Вісла», на цмонтери в Ріпках, попри місци, де стояла деревяна церков Рождества Пресвятой Богородиці (днес находит ся в скансені в Саноку), одкрыто памятник – камін з таблицьом писаном в лемківскым та польскым языках. Чытаме на ній м.ін.: Ту было село Ріпкы / W 1941 r. zamordowano rodzinę Cyganów / W 1942 r. wymordowano dwie rodziny Żydów / W 1947 r. wysiedlono 60 rodzin Łemków / Памятайме про Них. Памятник посвятил о. Володислав Канюк, парох Ганчовы, до котрой приналежат Ріпчане, маючы під опіком місцевий цмонтір, тіж находячий ся в адміністрациі православной парохіі Покровы Пресвятой Богородиці в Ганчовій. Ініциятором поставліня памятника был польскій професор – проф. Анджей Ячевскі, од років залюблений в Ріпках. Про ідею посвячыня і обставины, в якых до них дішло – писали сме в статі на портали lem.fm.

Перед посвячыньом і офіцияльным одкрытьом каменя, выже цмонтеря, при єдным з захованых крестів было правлене богослужыня за спочываючых гын предків. О. Канюк вчас проповіди спомнул, же неодолга быти може поведе ся огородити цілий теметів.

Долов поміщаме коротку фотореляцию авторства Ольгы Шевчык, котрій сердечні дякуєме за присланы знимкы.