Потопа іде по світовій премєрі в Арґентіні до Індії, пак на выходну Словакію

По шестьох роках роботы новый філм Потопа режісера Мартіна Ґонды дочекав ся міцного меджінародного штарту. По премєрі в Арґентіні іде на фестівал до Індії. Пак із ним творцьове прийдуть на выходну Словакію, де выникнув, і де окрем премєр будуть і діскусії.

В послінім новембровім тыждню одбуде ся серія премєр в Кошыцях, Снині, Гуменнім, Свіднику, Пряшові і Нехваль Полянці. В середу 12-го новембра 2025-го року о тім інформовали творцьове філму.

Способ навернутя голосу і памяти

Філм Потопа є першым постсоціалістічным граным філмом, котрый розповідать історію высельованя при будованю водного резервоару Старина.

„Філм выроснув із оточіня русиньской комуніты, і наточіли сьме го по русиньскы. Чутливым способом припоминать судьбы людей, котрых села мусили уступити будованю водного резервоару Старина, а подобны історії знають родины по цілій Словакії – коло Ліптовской Мары, Оравской гати ці іншых водных діл. То наш способ, як їм вернути голос і память,“ бісідує продуцентка філму Катарина Кырначова.

По Арґентіні до Індії

„Філм минувшый тыждень одпремєровали на арґентіньскім фестівалі Mar del Plata, і уж слідуючій тыждень буде промітаный на далшім вызначнім фестівалі катеофії А – Goa IFFI в Індії. Почас робліня філму про нас было важным, жебы быв зрозумілым нелем про домашню публіку і людей, котры процес выселіня пережыли, але жебы історія діяла універзално, а ословила і меджінародных зрітелів,“ приближыв продуцент Томаш Ґіч.

За його словами участь на престіжных фестівалах потверджує, же ся то подарило. „Тішыме ся, же по загранічных премєрах на двох далекых контінентах філм наконець будуть видіти і зрітелі в словацькых кінах, а о то веце, же першыма будуть якраз зрітелі на выході Словакії на реґіоналных предпремєрах,“ продовжує Ґіч.

Двоґенерачна выповідь

Філм Потопа є і історійов ґенерачного розколу. Сценарь, котрый написали Мартін Шустер, Домініка Удворкова і Мартін Ґонда, выникав по докладнім решерші добовых документів, розговорів із тыма, котры то памятали, як і з людми, котры заникнутя сел коло Старины документовали.

Творцьове поступно приходили на то, же молода ґенерація спринимала конець їх сел іншак як їх родічі, менше як траґедію, веце як потребу глядати новый початок.

Маря, головна геройка, в тім контексті представлює молодый, еманціпачный погляд. То дівчатиско, котре не хоче успокоїти ся із судьбов ґаздыні, а глядать властный спосов як жыти слободно.

„Моя постава Маря має силнішу тугу дістати ся гет, но єдночасно їй в тім не позволюють важны родинны причіны. Наконець, наперек вшыткым обставинам, їй сон літати є векшый як страх із няня або його незгода,“ говорить Сара Хрипакова, котра грає головну роль у філмі.

Предпремєры на выході Словакії

Потопа мала світову премєру в Арґентіні, продовжує свою путь на найвекшый філмовый фестівал в Індії, і в словацькых кінах буде од 4-го децембра того року.

Предперємры на выходній Словакії із участьов акторьского і творчого ансамблю одбудуть ся:  26. 11. (середа) o 19:30 – Кошыці, Kino Úsmev; 27. 11. (четверь) o 18:00 – Снина, Kino Centrum; 28. 11. (пятніця) o 18:00 – Гуменне, Kino Fajn; 29. 11. (субота) o 17:00 – Нехваль Полянка; 29. 11. (субота) o 19:30 – Свідник, Kino Dukla; 30. 11. (неділя) o 18:00 – Пряшів, Cinemax Novum.