Потопа здобыла найвеце словацькых філмовых премій Slnko v sieti

В четверь 9-го апріля 2026-го року одбыло ся святочне передаваня словацькых народных філмовых премій Slnko v sieti 2025. Тот річник быв уж 15-ый за порядком, популаріта тых премій значно росне, а і тот рік здобыли собі премії великый інтерес із боку медій, але і філмовой публікы.

На Slnko v sieti мав девять номінацій і першый по русиньскы граный філм Потопа, котрый быв у кінах од децембра 2025-го року.

Хоць конкуренція была тверда, бо в многых катеґоріях быв філм Потопа номінованый із такыма філмами як біоґрафічным Непелом ці драмов Отець, причім другый споминаный філм быв Словацьков філмовов і телевізнов академійов номінованый на тогорічных Оскарів за Словакію, Потопа стала єднозначно найуспішнішым філмом. Із девятьох номінацій наконець здобыла шість премій. Філм Отець здобыв пять премій, Непела лем три.

Домініка Удворкова, Мартін Ґонда і Мартін Шустер здобыли за філм Потопа премію в катеґорії Найліпшый філмовый сценарь. Богуміл Мартінак, Іван Дюркех, Квентін Колетт і Рено Ґійомен собі за Потопу однесли премію в катеґорії Найліпшый філмовый звук. Юрай Кухарек здобыв Slnko v sieti за філм Потопа в катеґорії Найліпша сценоґрафія.

Сара Хрипакова, котра в Потопі грала головну геройку, здобыла премію в катеґорії Найліпшый женьскый акторьскый выкон в головній ролі. Премію здобыв і Володимір Чема, котрый грав у філмі попа, і то в катеґорії Найліпшый мужскый акторьскый выкон в другорядій ролі.

Філм Потопа здобыв і Премію публікы Slnko v sieti. В тій катеґорії могли люди голосовати за свій найоблюбенішый філм 2025-го року, і найвеце голосів здобыла якраз Потопа.