«Потрібна є мудра політика взглядом меншын»

«Задачом уряду, міністерства єст підперати нацийональны і етнічны меншыны. Як урядова страна сме готовы до інтенсивной роботы» – заповіл міністер Томаш Сємоняк вчас засіданя Спільной Комісиі Уряду та Нацийональных і Етнічных Меншын, котре одбыло ся в четвер 24. жолтня/октобра 2024 р.

Спілголовами Комісиі были: зо страны уряду – державный секретар Міністерства Внутрішніх Справ і Адміністрациі Томаш Шыманьскій, а з меншыновой страны: Григорий Куприянович.

«Вызвы, робота, проблемы, тяжка спадковина років злой політикы і злого наставліня взглядом меншын, тото вшытко єст квестийом, з котром мусиме ся міряти. Я свого підходу не змінил. Уважам, што нацийональны і етнічны меншыны в політиці державы сут надзвычайні важны. То єдна з важнійшых обшыри Міністерства Внутрішніх Справ і Адміністрациі» – повіл міністер Сємоняк вчас засіданя Комісиі.

Шеф МВСіА підкрислил, што барз важным є, жебы засіданя комісиі проходили в атмосфері діалоґу і взаімного зрозумліня. «Спільна Комісия Уряду та Нацийональных і Етнічных Меншын была основана, жебы бесідувати і розвязувати ріжны квестиі. Зато залежало мі на днешній присутности на засіданю і спільній роботі. Ґарантую, же разом з віцеміністром Томашом Шыманьскым та спілведучым Григорийом Куприяновичом будеме спілпрацувати в ріжных обшырях, котры тыкают нацийональных і етнічных меншын» – зазначыл міністер Сємоняк.

Єдным з пунктів засіданя было омовити заложыня політикы державы взглядом нацийональных і етнічных меншын та соспільности, котра хоснує реґіональный язык. Представлено тіж інформацию о плянуваній в проєкті буджету державы на 2025 рік высокости середків на реализацию задач, котрых цілю є охорона, захованя і розвиток культурной достоменности нацийональных і етнічных меншын та захованя і розвиток реґіонального языка. Омовлено актуальны справы, в тым квестию звязану з фінансуваньом освіты нацийональных меншын.

Окрем того на засіданю покликаня з рук віцеміністра Томаша Шыманьского до складу Комісиі одобрал представник ормяньской меншыны Грачя Бояджян.

Фот. www.gov.pl